La Jornada Maya
K'iintsil
Ciudad de México
Martes 17 ti' septiembre, 2019
Tu k’iinil jo’oljeak, úuchik u k’iimbesa’al 209 ja’abo’ob jáalk’ab kuxtal noj lu’um tu’ux kaja’ano’one’, Independencia de México, beeta’ab le xíimbal meyajil suuk u beeta’al ba’ale’ te’e ja’aba’ yanchaj jump’éel noj k’eexil: asab ya’ab ko’olel chikpaj wa ku ke’etel yéetel bix beeta’abik ti’ uláak’ ja’abo’ob.
Táakpaj Miriam Martínez Magaña, máax yaan 25 u ja’abile’, leti’e’ yáax ko’olel piloto máax tsa’ay u líik’sik u péepen k’áak’il Texan T-6C; beyxan ti’ yanchaj Karen Vanesa Velázquez Ruíz, juntúul xcopiloto ti’ kamp’éel péepen k’áak’ k’ajólta’an beey jests caza supersónicos F5, leti’e’ 29 u ja’abil yéetel ts’o’ok lajun ja’abo’ob meyajnak FAM.
Je’el bix leti’obe’ ti’ xan táakpaj Cecilia Canto, leti’e’ yáax ko’olel tu pulajubáaj ti’ jump’éel paracaídas tu k’íiwikil u noj kaajil México. Kex tumen k’as su’ublake’ leti’e’ noj ba’al le tu beetajo’; ts’o’ok lajun ja’aob’ob xan jo’op’ok u meyaj, jo’op’ol táakpajak ti’ Brigada de Fusileros Paracaidistas, yéetel ts’o’ok 410 u téenal u pulikubaaj.
