Oochel AP
K'iintsil
Jueves 12 ti' septiembre, 2019
El Cairo
Máax jo’olbesik Al Qaeda, Ayman al Zawahiri, tu beetaj jump’éel páayt’aanil ti’al u loobilta’al Israel beyxan europeoil yéetel estadounidenseil nuup’ulo’ob yéetel, beey úuchik u ya’alal úuchik u k’a’ajsal u k’iinil loob beeta’ab tu k’iinil 11-S tu noj lu’umil Estados Unidos.
“Muyahidines láak’e’ex yane’ex Palestina yéetel uláak’e’ex yane’ex ti’ musulmán lu’umil. Ba’ax u k’áat Israel, beyxan estadounidenses, británicos, franceses, rusos yéetel europeose’, ts’o’ok u k’i’itbesa’al yóok’ol kaab”, beey tu ya’alaj máax p’áat tu jeel Usama bin Laden ti’ jump’éel cha’an ts’a’ab k’ajóoltbil tumen terroristail múuch’kabil, As Sahab.
Egipcio yihadistaiIe’ tu ya’alaje’ Israel yéetel máaxo’ob múul yano’ob yéetele’ “táan u xu’ulsiko’ob yihad" ichil palestino lu’umil. “Beey túuno’, je’el bix táan u múuch’ulo’ob ti’al u yantal u muuk’o’ob t-óok’ole’, to’on xane’ unaj kch’a’apachtiko’ob je’el tu’uxake’ yéetel je’el ba’axak k’iin ken kjets’ej. Patjo’olnene’ex yéetel tukulte’ex uláak’ bix je’el u páajtal u beetchajal”, tu ya’alaj.
Al Zawahirie’ p’áat tu jeel Bin Laden ti’al u jo’olbesik Al Qaeda úuchik u kíinsa’al tumen fuerzas especiales ti’ u noj lu’umil Estados Unidos yaano’ob Pakistán ba’ale’ kex beyo’ ku tukulta’ale’ u ta’akmajubáaj, naats’ ti’ u xuulilo’ob yéetel Afganistán.
Te’e k’a’ayatajil tu beetajo’, uts úuchik u t’aan yóok’lal loobilaj beeta’an 11-S yóok’ol Torres Gemelas, Pentágono yéetel Pennysilvania tu’ux kíim kex 3 mil u túul máak. “Taak in k’áatik te’ex wa ka tukultike’ex le ka’aj beeta’ab loob World Trade Center to’one’ tkíinsaj máak mina’an u si’ipil, ba’ale’ le je’elo’ jump’éel ba’al ma’ jaajo’, láayli’ xan mina’an u si’ipil máaxo’ob kíinsa’ab Pentágono”, beey k’áatchibta’ab.
Le beetike’, páayt’aan beeta’ab ti’ yihadistailo’ob ti’al u loobiltiko’ob fuerzas occidentales yaan yóok’ol kaab, u ya’abile’ ti’ yaan ti’ musulmán noj lu’umo’ob. “Ko’one’ex loobiltik yóok’lal k’aasil tu beetajo’ob Palestina yéetel tumen ku yáantiko’ob Israel”, tu ya’alaj.
U jala’achil u lu’umil Estados Unidos, Donald Trump, tu jo’olbesaj jump’éel súutukil úuchik u k’a’ajsa’al le óoli’ 3 mil u túul máak kíim yóok’lal Al Qaeda tu ja’abil 2001 ti’al u ya’alike’ wa tumen ka’a beeta’ab loob ti’ u noj lu’umo’ob tuka’atéene’ yaan xan u núukik “je’el bix mixjuntéen yáax ila’ako’”.
