Europa Press
Oochel Reuters
K'iintsil
Jueves 13 ti' junio, 2019
U ts’o’otsel oso polare’ jch’a’ab ti’al u beeta’al jump’éel sintético aislante ku kaxtik u k’atik u beel k’íinalil wa u beetik u p’áatal ooxol tu’ux yaan, je’el bix u yúuchul yéetel u jaajil tso’ots.
U jela’anil yéetel u tso’otsel uláak’ mamífero ba’alche’ob wa u tso’otsel u pool wíinike’, leti’ u joolilo’ob. Yéetel u yáantajil microscopioe’, jujump’éel tso’otsele’ yaan jump’éel chowak chuunil yéetel cilíndrico jo’ojol yanik ti’ jump’éel toj t’o’ol yaan tu ts’u’. Ts’o’ok u yúuchtal ojéelta’ake’ bix yanik yéetel u nojochil le joolilo’oba’ leti’ ba’ax beetik u yantal jejeláas u sak teep’ilo’ob. Ba’ale’ láayli’ ti’ xan ku jóok’ol ba’ax beetik u p’áatal k’íinalil yiknáalo’ob, ma’atech u ch’u’ulul yéetel ku sáats’al, ba’alo’ob ku kaxta’al u beeta’al yéetel aislante térmico.
“U tso’otsel oso polare’ ts’o’ok u p’a’atal tu beel yanik ti’al u yáantaj ma’ u sa’atal k’íinalil le ken u beet ke’el wa le ken yanak koj síis, le beetike’ jump’éel no’ojan ba’al ti’al u beeta’al aislante de calor sintético. Le ken beeta’ak aerogel ichil u tubosil carbono, ku páajtal u beeta’al jump’éel nu’ukul análogo beeta’an yéetel jump’éel ba’ax ku sáats’al yéetel sáal, tu’ux ka páatak u p’áatal k’íinalil ba’ale’ ma’ ti’al ka k’asak tu paach k’iini’”, beey úuchik u tsolik Yu Shuhong, juntúul ti’ le máax táakpaja’an ti’ le xak’al xooko’ yéetel u jka’ansajil Universidad de Ciencia y Tecnología de China (USTC, yóok’lal bix yanik u k’aaba’ ich inglés) ti’ Academia China de Ciencias.
