De la Redacción
Boonil Rufino Tamayo
K'iintsil
Jo', Yucatán
Martes 12 ti' diciembre, 2017
Jueves 14 ti’ diciembre ku taala’, 8 áak’ab, tu noj najil xook Universidad Marista yaan u ko’onol 150 u p’éel u boonio’ob Galería Bernardini. U tuukulile’, u mu’uch’ul taak’in ti’al ka yanak ti’al u yáanta’al xoknáalo’ob tumen najil xooka’. Koonole’ yaan u beeta’al tu auditorioil Pablo Hernández García yéetel x ma’ bo’olil u yokol máak.
Ichil jump’éel k’áat chi’ tsikbal beeta’ab yéetel Aydi Azcorra, máax beetik u Coordinadorail Imagen y Diseño ti’ Universidad Marista, ti’ u kaajil Jo’, tu ya’alaj jejeláas bix le meyaj ku konbilo’obo’, tumen yaane’ ku chukik 1.80 metros u nojochil, ts’o’okole’ u jach mejenile’ 50 centímetros. Yaan xan u ko’onol póol meyaj beeta’an láayli’ jejeláas u p’iisilo’ob, yaane’ j beeta’an tumen aj its’ato’ob Israel Montes, José Concepción García, Francisco Thompson, Carlos Genova yéetel Rafael Coronel.
“Tuláakal taak’in ku much’bile’ yaan u ts’a’abal ti’al u yáanta’al xoknáalo’ob tumen najil xook. Kex u 40 por cientoil u xoknáalilo’ob le kúuchila’ ku k’amik áantaj ti’al u béeytal u ts’o’oksik u xooko’ob. K k’áat ka ya’abak xoknáal ku yáanta’alo’ob ts’o’okole’ koonolo’ob je’el bix le je’elo’ tukulta’an ti’al ka múuch’uk taak’in ti’al ka yanak áantajil”, tu ya’alaj.
U kúuchil Bernardini ku péektsiltik yéetel ku ye’esik jejeláas its’atil meyajo’ob ti’al u ko’onol yéetel ti’al ka yanak kúuchilo’ob tu’ux ka cha’anta’ak its’at, tumen beey ken jóok’sa’ak taanil ba’ax táan u beeta’al. Le ken ts’o’okok koonole’, yaan u t’o’oxol vino.
