Katia Rejón
Oochel Comunicación CCUT
K'iintsil
Jo’, Yucatán
Miércoles 28 ti’ noviembre, 2017
Ti’al u péektsilta’al úuchben its’at yo’olal ba’ax suuk u yila’al ka’ach úuche’, yaan u beeta’al yéetel u yáantajil jup’ boone’, u yóox e’esajil ti’ u ketlamil [i]In Tlilli in Tlapalli[/i]. U k’u’ubul chíimpolal ti’ máax ku náajale’, u tse’ekil máako’ob jach kaambanaja’ano’ob yo’olal úuchben jup’ boon yéetel u ts’a’abal k’ajóoltbil 26 u p’éel oochelo’obe’ yaan u beeta’al tu kúuchil Centro Cultural Universitario Tlatelolco, 29 ti’ noviembre ku náats’alo’ tu súukul 7:30 áak’ab.
Le meyaj ku beetbila’, jóok’sa’ab ti’ u tuukulil u ja’il ts’íib tumen ti’ ku múuch’ul k’ajóolal, le beetik beey ts’a’abik u k’aaba’o’, [i]In Tlilli in Tlapalli[/i], ich náhuatl t’aane’ u k’áat u ya’al “u ja’il boox ts’íib, u ja’il ts’íib jejeláas boonil”, ts’o’okole’ ku ch’a’anuktik u tuukul u máansa’al ti’ uláak’ máak ba’ax ojéela’an.
Ichil jump’éel k’áat chi’ tsikbal yéetel Ricardo Corona, máax beetik Jefe de Producción de Exposiciones ti’ u kúuchil Centro Cultural de Tlatelolco, tu tsikbaltaj ketlame’ jóok’sa’an óox jaatsi’: wooj patjo’olta’an, k’a’anan u yáax ch’a’abal u woojil jump’éel úuchben boonil; je’el bixak ka tukulta’ake’, u woojile’ k’a’abéet jóok’sa’an ti’ uláak’ úuchben woojil; yéetel le suuk u yila’al México, tu’ux k’a’abéet u táakbesa’al u tuukulil tsikbalo’ob yéetel ba’ax ku k’iimbesa’al México.
Te’e ja’aba’ táakpaj 120 u túul máak, ti’ jump’éel jatse’ yéeya’ab lajuntúul máak, beeyxan úuchik u beeta’al yéetel le uláak’ ka’ajaatso’obo’, máaxo’ob ts’áabo’ob yéeyaje’ máako’ob jach kaambanaja’ano’ob ti’ jejeláas ba’alo’ob je’el bix Demián Flores, j its’at jach k’ajóolta’an te’e k’iino’ob tu lu’umil México, x jup’ boon yéetel diseñadora gráfica Ka’ Larraza, j jup’ boon sijnál Colombia Mati Mateus yéetel u x xak’al xookil UNAM, Saeko Yanagisawa, máax ya’ab ba’al u yojel yo’olal úuchben woojil.
Ti’al u yéeya’al u jach ma’alo’obil meyaje’, ch’a’anukta’ab bix uchik u beeta’al jup’ boonil, ba’ax woojil beeta’an yéetel tsikbal yo’olal u yuumilo’ob, ba’ax u k’áat u ya’al u ti’alo’ob. Oochel jch’a’ab ti’ jup’ boono’obe’ yaan u ye’esa’alo’ob te’e kúuchilo’, martes tak domingo, lik’ul 10 ja’atskab k’iin tak 6 táan u taal u yáak’abtal, tak tu ts’o’okbal febrero 2018. Beyxan yaan xan u ts’a’abal k’ajóoltbil tsikbal jbeeta’ab yéetel máaxo’ob táakpaj, yo’olal bix tu máansilako’ob ka’alikil ti’ yano’ob CCU Tlatelolco.
