Merry MacMasters
K'iintsil
U noj lu'umil México
Miércoles 22 ti' noviembre, 2017
Wa ma’ u séeb kíimik ka’ach Fernando García Ponce (Jo’, Yucatán, 1993-U Noj Kaajil México, 1987) aj boon yéetel juntúul máak táakpaj ti’ u k’iinilo’ob Ruptura, ba’ax wal je’el u beetik walkila’, ma’atáan in tukultik wa tu jets’aj u meyajtik instalaciones, beey tu ya’alaj Malú Block, máax beetik u codirectorail u kúuchil Galería Juan Martín.
Ti’ juntúul aj its’ate’ k’a’anan mantats’ u boon je’el bix u ch’a’ak xan u yiik’, je’el ba’axak bíin u beet máake’, ku ya’alik Block, máax tu k’ajóoltaj García Ponce tu k’iinilo’ob ti’ yaan Juan Martín, ma’ili’ máanak tu kúuchil Galería Ponce, je’eb tumen u suku’un Carlos tu táanchúumuk u ja’abilo’ob 70 ti’ le siglo máaniko’, yóok’ol u bejil Belgrado, Zona Rosa.
Kex beyo’ láayli’ u túuxtik u meyaje’, ku ya’alik ti’ jump’éel k’áatchi’ tsikbal yéetel [i]La Jornada.[/i]
[b]Patjo’ol meyaj ichil u ja’abil 1970 tak 1986[/b]
U kúuchil Galería Juan Martín yaan u béeykunsik u chúunsik le meyaja’ tu k’iinil sábado 25, le kéen ts’a’abak k’ajóoltbil u ye’esajil Presencia continua, tu’ux yaan 19 collages ti’alinta’an tumen u múuch’kabil Fundación García Ponce, káajsa’ab tumen aj its’at ichil u ja’abil 1970 tak 1986. Ba’axten collages ku beetik, Block ku ya’alike’ leti’e meyaj asab tu beetajo’. Ba’ale’ je’el bix úuchik u beeta’al tumen Fernando mina’an u jeel tu noj lu’umil México.
Jump’éel meyaj jela’an ti’ uláak’ ku beeta’al te’e k’iino’obe’, ku ya’alik Graciela Toledo: jach ki’imak k óol úuchik k k’amik e’esajila’.
Block ku ya’alik yo’olal u meyaj García Ponce, jump’éel ba’al mina’an u k’iinil ts’o’okole’ beey láayli’ túumben je’ex u k’iinil uchik u beetik. Ku ya’alik k’iinilo’ob walkila’ ma’atech u na’atalo’ob wa mina’an Ruptura, aj its’ato’ob táakano’ob ichile’ ti’ yaan Manuel Felguérez, Vicente Rojo yéetel Francisco Toledo, máaxo’ob láayli’ táan u kaxtik u beelo’ob.
Ba’ale’ tu meyaj García Ponce ku chikpajal ki’imak óolal yéetel kuxtal, ku ya’alik Block, máax ku tsikbaltik jats’uts u yilik its’at abstracto, tumen ku cha’ak u cholk’ajal tuukul, mina’an u xuul.
Te’e e’esajilo’ táaka’an u boonilo’ob: [i]Composición sobre azul añil (1970), Figura/fondo azul, con papel (1971), Homenaje a Picasso, con acrílico (1976), Collage VI (1980), Proyecto collage (1980); Proyecto No. 1, con guache, Rojo/negro (1980), Rojo y gris, caja negra (1981), Sin título(1982), Sin título 33-1 (1984), 0.22(1984), Composición de cuatro cuadros rojos (1984), Composición negra/ocre (1984), Dibujo sobre cartón (1984), Composición con mancha (1985), Mancha azul/rectángulo rojo (1985), Formas geométricas/rojo (1986), Sin título (1986)[/i] yéetel [i]Sin título No. 1 (1986).[/i]
