De la Redacción
Oochel Cuartoscuro
K'iintsil
Martes 21 ti' noviembre, 2017
Yéetel u muuk’il u yóolo’obe’, aj áalkabo’ob Santiago, Mario yéetel Juana Ramírez, máaxo’ob sijnáalo’ob tarahumara miatsile’, táakpajo’ob tu ketlamil áalkab Maratón del Oso Polar tu kaajil Churchill, Manitoba, Canadá. Óoxp’éel u jaatsil tu’ux tu ketajuba’ob: Ultramaratón 50km u chowakil, chuka’an maratón 42 km u chowakil yéetel chúumuk maratón 21 km u chowakil.
U bejile’ ma’ chéen ch’a’abil u yáalka’abta’ali’, jach ke’el, ba’ale’ le je’elo’ ma’ náach ku máan ti’ bix u síisil u kaajalo’obi’. Kex beyo’, u séeba’anil u yáalkab Santiago Ramírez tu beetaj u náajaltik u yáax kúuchil Ultramaratón, ka’alikil u yaal, Mario Ramírez, jp’áat tu ka’a kúuchil ti’ chuka’an maratón. Tu ketlamil áalkab ko’olele’, ma’ xan jp’áato’ob paachili’. Juana Ramíreze’ tu náajaltaj u yáax kúuchil ti’ chúumuk maratón.
Kex tumen uláak’ máako’ob táakpaj te’e ketlamo’ u yojelo’ob jayp’éel ba’alo’ob yo’olal tarahumara’ob uchak u xokiko’ob u áanalte’il Nacidos para correr, ja’ak’ u yóolo’ob uchik u yilko’ob bix u chichil u yáalka’ab u máasewal máakilo’ob Chihuahua. Tak Santiago, juntúul j-áalkab máak sijnáal Alemaniae’, ka tu yojéeltaj yaan u ketikubáaj yéetel juntúul tarahumarae’ tu yojéelyaj ma’atáan u béeytal u máan táanil ti’.
Tu ketlamil áalkab Maratón del Oso Polar tu kaajil Churchill, Manitoba, Canadá, ku yantal u píitjo’olta’al jayp’éel ba’alo’ob, je’el bix u síisil le kaajo’, tumen ku yéemel tak -20°C, ts’o’okole’ ku yu’uba’al beey -27°C u ke’elil, ts’o’okole’ yaan u sajbe’entsil u jóok’ol osos polares yóok’ol bej.
