Dpa
Oochel HDWallSource.com
K’iintsil
Lunes 13 ti’ noviembre, 2017
Tuláakal máak jets’ ka tu yilaj u yokol Naomi Campbell yéetel u láak’inajo’ob. Ma’ yáax juntéen u ch’a’abal u yoochel ti’al u calendarioil Pirelli, ba’ale’ le ku jóok’sbil 2018 jela’an ti’ le uláak’o’obo’, tumen tuláakal máax táakbesa’abe’ boox oote’lo’ob. Tak chéen ti’al selfi ku ch’a’ak yéetel smartphone, Campbell ku kaxtik bix u jach jóok’ol tu beel. Ku páajtal wáaj u jóok’sa’al chéen sak yéetel boox, ¡Jach k’aax le sáasila’!, ku ya’alik ti’ juntúul reportero uchak u k’áata’al ti’ jump’éel oochel.
Ya’abach juntéene’ ku tsikbalta’al ba’alo’ob yo’olal Campbell tumen jach ku patkubáaj, ba’ale’ tak bejla’e’ tu yóole’ láayli’ chika’an u noj ba’alil yéetel u ki’ichpani. 47 u ja’abil, ts’o’okole’ láayli’ ti’ ku sutulsuut tu’ux yaan ba’alo’ob yo’olal moda yéetel oochelo’ob, je’el tak u ya’alal ts’o’ok u suuktal u táakbesa’al tu calendarioil Pirelli, ku tukulta’ale’ mina’an uláak’ u jach ma’alo’obil oochelil je’el bix le je’elo’.
Túumben meyaje’ beeta’an yéetel u tuukulil Alicia en el país de las maravillas, le beetik jts’a’ab u nook’ jach fantástico.
[b]U súutul máak u yaanalil[/b]
-Tak tu’ux ku náakal ba’ax ku chikbesik tu táan cámara’ob b’aalo’ob je’el bix set yéetel búukinajo’ob.
-In ti’ale’ tuláakal ba’al le je’elo’. Lik’ul ken k’uchken, u súutukil u bo’onil in wich, u tso’otsel in pool… ka k’éexel. Beey in wu’uyik mantats’, lik’ul u k’iinil uchik in káajsik in meyajtik modelaje. Jach uts tin wich le k’eexilo’oba’, uts tin wich in wu’uyik yaanal máaken, yaanal ba’al. Wa ma’ k’uchkech set ma’ tu páajtal a wojéeltik ba’ax ken úuchuk.
- Le beetik k’a’abéet a woksaj óoltik u meyaj aj ch’a’a oochelo’ob. Bix uchik a meyaj yéetel Tim Walker ti’al le calendario’a’.
- Jach ma’alo’ob tumen Time’ ku tsikbal. Yanchaj in luk’ul Nueva York ti’al in bin Londres yo’olal le oochelo’oba’, ba’ale’ in wojel ma’alo’ob ba’ax ku taal tumen yaan in súutul yaanal ba’al. Ts’o’ok u máan 31 ja’abo’ob káajak in beetik in modeloil, yéetel mantats’ taak in wilik bix juntúul máak beetik in k’éexel.
– Ts’o’okole’ a meyaj ti’al Pirellino jump’éel ba’al túumben ti’ ba’ax ka beetik...
–Ts’o’ok u máan ya’abach ja’abo’ob káajik in meyaj ti’al Pirelli. Lik’ul 16 in ja’abil, veinte, treinta yéetel walkil tin cuarenta. Jach ki’ichkelem ba’al kin wu’uyik yo’olal.
– Calendario te’e ja’aba’, ma’ jach sexy je’el bix le yáax beeta’ano’obe’. Yaan wáaj ba’ax ts’o’ok u k’éexel ti’ Pirelli.
– Teche’ táan a t’aan yo’olal jump’éel bikini yéetel ka chikpajak ya’abach oot’el. Tene’ kin chikpajal ba’ale’ bak’a’anen yéetel PVC plástico. In ti’ale’ le je’elo’ jach sexy.
– Ba’ale’ le calendario’a’ jach jela’an, tuláakal máax ku táakpajale’ boox oot’elo’ob. Ba’axten ka tukultik k’a’anan a chikpajal xan.
–Tumen kin tukultik wa ma’ táan in beetike’ yaan in wu’uyik yaan in junpáaykunsa’al tumen u pik’il ju’unil in lu’umil. Yaan k’iine’ k’a’abéet in meyaj tak tu 110 por cientoil ti’al in we’esik in miatsil.
– Láayli’ wáaj u jach chikbesa’al sak ko’olelo’ob tu meyajil moda yéetel oochelo’obe’.
– Yaan jayp’éel noj lu’umo’ob, ti’ mejen k’a’aytajilo’ob, tu’ux ku ye’esa’al ba’alo’ob yo’olal ki’ichpanil. Mantats’ u chikbesa’al ba’ax suuk u yila’al. Ichil ba’alo’ob yo’olal moda’e’ yaan ba’alo’ob ts’o’ok u ma’alobchajal, ba’ale’ ichil ba’alo’ob yo’olal cosmético’obe’ ma’ beyi’i.
–Ba’ax ka wilik ts’o’ok u k’éexel tak walkila’ yo’olal jejeláasil.
– Walkila’ ma’ táan u páajtal u ya’alal wa mina’an u jejeláasil yóok’ol kaab, tumen hip hop u jach k’a’ananil paax k miatsil, ma’ rocanrol je’el bix ka’ache’. Ma’ tu páajtal u ya’alal wa mina’an, tumen ku chikbesa’al tu táan a wich je’el tu’uxak ka xi’ikeche’.
– Ba’ax taak a wa’alik ti’ táankelem boox oot’el modelos táan u líik’ilo’ob, je’el bix Duckie Thot.
– Ma’ unaj u p’a’atalo’ob yóok’ol bej tu juunalo’obi’, k’a’anan u yantal u muuk’o’ob yéetel ma’ u xu’ulul u yóolo’ob ti’al ka béeyak u beetik ba’ax u k’áato’ob.
– Ba’ax túun taak a wa’alik ti’ táankelem modelo’ob taak u beetiko’ob ba’ax ts’o’ok a beetik teech.
– Wa ku beetiko’ob ba’ax u k’áato’obe’, yaan u béeytalo’ob. K’a’abéet ma’ u sa’atalo’ob, u yu’ubajo’ob yéetel u kaambalo’ob. Beey in wilik ti’ jaytúul táankelemo’ob, Adut (Akech) yéetel Kaya Gerber. Jach yaan u na’ato’ob; tin wilajo’ob París.
- Ku yu'ubajo'ob, tuláakal ku kaniko'ob. Máake' ma' táan u tukultik wa beyo', ba'ale' u ts'áamaj u yóolo'ob tu meyajo'ob.
