Paul Antoine Matos
Oochel Instagram davepruettphoto
K’iintsil
Jo’, Yucatán
Martes 7 ti' noviembre, 2017
Te’e k’iino’oba’, ja’ak’ u yóol yukateko’ob uchik u yojéelta’al jch’a’ab u yoochel chaknul ko’olelo’ob tu kaajil Izamal, Río Lagartos, úuchben kaajo’ob, ts’o’ono’ot yéetel haciendas, ba’ale’ xwo’okinil yanchaje’ je’el u beetik ma’ u suuto’ob tuka’atéen te’e kaajo’.
U jo’olpóopil Izamal, Warnel May Escobar, tu cha’aj u beeta’al le oochelo’obo’ yéetel ti’al u k’a’alal bejo’ob tu yóok’olal, beey tu ts’íibtaj u xmodeloil UTadventure, Sienna Hayes, tu kúuchil Instagram.
“Ts’a’abto’on tuláakal u páajtalil ti’al kmeyaj, le beetik k’a’al bej ti’al ma’ u máan kis buuts’o’ob te’e baanta’o’, le beetik yanchaj xwo’okinil yiknal jo’olpóop ka’alikil táan u máan u k’iinilo’ob yéeytáambal, tumen leti’e’ tu cha’aj ka beeta’ak le oochelo’oba’”, beey tu ts’íibtaj xcanadienseil yáanal u yoochel tu’ux ku jóok’ol xma’ nook’il, ba’ale’ tu’ux ku balik xan u yiim yéetel u xts’íik k’abil, yiknal jump’éel fuente tu kaajil Izamal, paachile’ ku chikpajal jump’éel k’an najil k’uj.
Ku tukultik che’ejlakil xwo’okinil yanchaj redes sociales yéetel kúuchilo’ob k’a’aytajil péektsil Yucatán uchik u yiliko’ob xchaknul ko’olel, tumen “kajnáao’ob kaja’ano’ob tu’ux jch’a’ab oochelo’obe’ jach ma’alo’ob uchik u k’amiko’on, ts’o’okole’ tak tu ya’alaj tak u ts’áakto’on jayp’éel meyaj k’abo’ob ti’al u chikpajal te’e oochelo’obo’”.
Tu ya’alaj yaan u tsikbalta’al ba’ax ucha’an kéen “ch’íijik yéetel ken xi’ik u boonil”, yéetel jach yaan u ki’imaktal u yóol ken suunak México ti’al marzo ba’ale’ “ma’ táan u suut te’e kaajo’ yo’olal xwo’okinil yanchaji”. U suut Yucatáne’ tukulta’an ti’al u yóox k’iinil marzo ku náats’alo’, beeyxan ti’al u k’iinil 31 ti’ octubre ti’ 2018.
U mola’ayil UTadventure ku xíimbaltik Utah wa México jo’op’éel k’iino’ob, ti’al u jóok’sik u yoochel óoxtúul xchaknul modelo’ob. U xíimbalta’al jump’éel lu’ume’ tu tojoltik 3,600 dólares.
Ti’ redes socialese’ ts’íibta’ab jayp’éel ba’alo’ob yóok’olal modelo’obe’, tumen j-a’alab ka tséenta’ako’ob kex yéetel ka’ap’éel u tortail cochinita tumen mina’an u yíimo’ob, asab ya’ab u ch’ala’atelo’ob.
