Katia Rejón
Oochel Raúl Angulo Hernández
K’iintsil
Jo’, Yucatán
Lunes 23 ti’ octubre, 2017
U cha’anil Oktoberfest ma’ chéen uti’al máaxo’ob yaabiltik Alemania, ti’al máaxo’ob jats’uts u yilko’ob u yuk’iko’ob jump’éel ma’alo’ob cerveza yéetel ki’iki’ janal, máak beyo’ je’el tu’uxak ku yila’alo’ob, beey tu ya’alaj Eric Rubio Barthell, máax beetik u Coordinador Generalil ti’ u Lu’umil Yucatán, uchak u káajal Oktoberfest 2017, cha’an jbeeta’ab lik’ul 20 tak 22 ti’ octubre, tu kúuchil Unidad Deportiva Rogers, tu xamanil u noj kaajil Jo’.
Te’e noj kaaja’ yaan kex ukp’éel mola’ayo’ob ku meyajo’ob yéetel ku táakpajalo’ob ti’ Oktoberfest 2017 ja’ab man ja’ab. U chíikulal cerveza, najilo’ob xook tu’ux ku kanik máak alemán, u jejeláasil salchichas yéetel bak’o’ob, beyxan ki’ waajo’ob, óok’ot yéetel paax, chéen jayp’éel ba’alo’ob yanchaj te’e cha’ana’ tu’ux yanchaj u bo’ota’al 70 pesos ti’al u yokol máak.
Rubio Barthell tu páayt’antaj máak ti’al ma’ u yila’al beyka’aj náachil p’aatal Yucatán ti’ Alemania yo’olal bix yaniko’ob ti’ mapa, naats’ yaniko’ob tumen yo’olal cha’an káaj u beeta’al tu ja’abil 1810 tu noj kaajil Bávara, Múnich, ba’ale’ walkila’ cha’ane’ láayli’ u beeta’al tu lu’umil Mayab.
Ichil jump’éel k’áat chi’ tsikbal jbeeta’ab La Jornada Maya, yéetel Wolfgang Kresse González, u cónsulil Alemania tu lu’umil Yucatán, tu ya’alaj yaan kex 300 u túul alemanilo’ob kaja’ano’ob Jo’, máaxo’ob ken taako’obe’ ku kaxtik u yotocho’ob ti’al u p’áatalo’ob weye’ tumen ku yutstal tu yicho’ob miatsil, jaajkúunajil yéetel jets’ óolal.
Ja’ab man ja’abe’, táan u bin u nojochtal le cha’ana’, ti’al u ja’abil 2016 jk’a’am kex 6 mil u túul máak tu yóoxp’éel k’iino’ob, beey tu jets’ cónsul.
Cha’ane’ káaj je’ex suukile’, táakpaj cónsul ti’ uláak’ noj lu’umo’ob, mola’ayilo’ob Alemania ku meyajo’ob ti’ Yucatán yéetel jala’acho’ob.
U Balletil Oktoberfest tu beetaj óok’otilo’ob suuk u yila’al Alemania je’el bix maypole yéetel polca. Ka’alikil te’e súutuko’ jbin kex 300 u túul máako’ob ki’ jaano’ob yéetel tu yuk’ajo’ob u ja’il káaltal.
