Katia Rejón
Oochel
K'iintsil
Jo', Yucatán
Miércoles 11 ti' septiembre, 2017
U mola’ayil Comisión de los Derechos Humanos del Estado de Yucatán yéetel DIF te’e noj kaaja’, tu chíimpoltajo’ob máax náajalnajo’ob tu yóox ketlamil oochel [i]Adultos mayores y derechos humanos[/i], jo’oljeak martes, tu kúuchil Centro Cultural Olimpo.
Yáax kúuchile’ náajalta’ab tumen Mayra Guadalupe Canche Pacab yo’olal u yoochelil [i]Origen de la Mirada[/i]; ka’a kúuchile’ náajalta’ab tumen Jonathan Arévalo Ramos yo’olal u yoochelil [i]Los bailarines[/i], yéetel u yóox kúuchile’ tumen Georgina Matú Amaya, yo’olal u yoochelil [i]Momentos[/i]. Ti’ leti’obe’ jk’u’ub 10 mil, 6 mil yéetel 4 mil, yo’olal u kúuchil tu náajaltajo’obe’.
Ombudsman wey noj lu’uma’,, Enrique Goff Ailloud, tu jets’aj jaaj yaan ch’ija’an máak ku loobilta’al tumen u láak’tsilo’ob wa tu meyajo’ob. Kex tumen leti’obe’ unaj táan u ki’imak óolalo’ob tumen ts’o’ok u máan u k’iinil u meyajo’ob, tu ya’alaj, ba’ale’ ma’ xan táan u páajtal u ch’éenel u meyajo’ob tumen taak’in ku k’u’ubul ti’obe’ ma’atech u chukik ti’al u kuxta’alo’ob je’ex unaje’.
“Payalt’aane’ ku kaxantik u péektsiltik bix u kuxtal ch’ija’ano’ob, ti’ le k’iino’ob tu’ux ya’abach ba’alo’ob ts’o’ok u k’expajal yéetel mina’an nu’ukbesajo’ob ti’al ka’ansajil mix túumbenkunsajil”, tu ya’alaj Goff Ailloud.
Beyxan tu ya’alaj ma’ jaaj wa yaan tak pool beeta’al yóok’ol u mola’ayil Codhey, yo’olal loobilaj ku yantal ich le mola’aya’, beyxan tu beetaj jump’éel payalt’aan ti’ ka yanak uláak’ ma’alo’ob yéetel túumben a’almaj t’aan ti’al u na’ata’al u ch’íijil máak je’el bix unaje’. “U láak’tsilo’ob máaxo’ob laj luk’sik ba’al ti’ob, leti’ob p’atiko’ob chéen beyo’, ts’o’okole’ ku loobiltiko’ob. Táan k p’áatal k’aas yéetelo’ob”.
Te’e súutuko’, chíimpolta’ab u k’aaba’ xan Eymi Guadalupe Collí Suárez, Lilia Balam Magaña, Pedro Tec Chim, Elda Vales Manzanilla yéetel Eduardo Ortíz Galaz.
