Armando G. Tejeda y Afp
Oochel Sasil Sánchez Chan
K'iintsil
Barcelona
Miércoles 23 ti' agosto, 2017
Ka jts’o’ok u t’aan yéetel kantúul ti’ máax jma’ach yo’olal loobilaj beeta’ab Cataluña, máax beetik juez ti’ Audiencia Nacional de España, Fernando Andreu, tu beetaj auto judicial tu’ux je’ets’ u k’a’alal ka’atúul ti’ le je’elo’obo’, Mohamed Houli Chemal yéetel Driss Oukabir, ba’ale’ beeyxan yaan u k’a’alal Sahl El Karib, 72 horas, yéetel le beyka’aj keen u biins u yojéeltal uláak’ ba’alo’ob yo’olal ba’ax úuchi. Uláak’ juntúule’ Mohamed Alla, ka’alikil u yila’al ba’ax ku yúuchule’ jcha’ab u jóok’ol.
Óoli’ las once ja’atskab k’iine’, k’áatchita’ab tumen magistrado máax macha’ano’ob. Káaj yéetel Houli Chemal, máax tu éejentaj táaka’an ich u múuch’kabil yihadista tu beetaj loobilaj ti’ La Rambla, tu kaajil Barcelona yéetel k’aasil jbeeta’ab Cambrils.
Leti’e’ tu ya’alaj táan ka’ach u líik’sikuba’ob tia’al “u beetikoo’ob noj loobilaj” ti’ “kúuchilo’ob yéetel najilo’ob k’uj”, ti’ le noj kaajo’, jump’éel ti’ le ku jach xíimbalta’alo’ob ti’ Europa.
Uchik u je’ets’el le je’elo’, jueze’ tu táakbesaj Houli Chemal yéetel Oukabir -u suku’un ti’ máax ma’ach Cambrils, ts’o’okole’ leti’ máax majáant u kis buuts’ilo’ob loobilaj beeta’ab.
Ba’ale’ kex beyo’, láayli’ ma’ sáasil yanik ti’ juez wa jaaj uchik u táakpajal Sahl El Karib, u yuumil yéetel máax jo’olbesik locutorio ti’ Ripoli, t’aanaj jaytúul ti’ máaxo’ob táakano’ob ti’ célula yihadista tia’al u maniko’ob boletos ti’ péepen k’áak’.
Tu ts’ooke’, Mohamed Alla cha’ab u jóok’ol tumen ma’ béeychaj u je’ets’el wa táakpaj ti’ le loobilajo’, kex tumen leti’ u yuumil Audi A3, kis buuts táan ka’ach u máansa’al tumen u suku’un, máax kíim ka yanchaj ts’oonil, uchik u je’elsalo’ob ti’ Cambrils.
Ka’atúul máax macha’abe’, túuxtabo’ob k’albil tu kúuchil Soto del Real.
U kanaj kaajil Cataluñae’ -Mossos d´Esquadra- tu ya’alaj lunes máaniko’, le lajka’túul máak táaka’an ti’ célula yihadista, ku tukulta’al nuup’ul yéetel Estado Islámico (EI), ch’éensa’an u meyaj. Waxaktúul ti’ le je’elo’obo’, kimeno’ob (waktúule’ kíimo’ob ti’ operativos yanchaj Cambrils yéetel Subirás, ts’o’okole’ uláak’ ka’atúulo’obe’ kimen uchik u kaxtalo’ob tu najil Alcanar). Kantúul p’aatalo’obe’ leti’e ku xak’alta’al u si’ipilo’ob.
Younes Abouyaquob, máax tu pe’etaj u kuxtal xane’, leti’ máax jéenant wíinik tu bejil La Rambla, Barcelona. Ba’ale’ kanan kaaje’ táan u beetik xaak’aliloob tia’al u yojéeltik uláak’ ba’alo’ob, tia’al u sáasilchajal wa yanchaj uláak’ áantaj ka taalak ti’ Marruecos, Francia yéetel Bélgica.
Houli Chemal, juntúul táankelem xi’ipal ti’ España, síij ti’ Melilla, 21 u ja’abil, chéen leti’ ma’ jkíim uchik u wáak’al u najil Alcanar, tu baantail Tarragona, jump’éel k’iin táanil ti’ loobilaj jbeeta’ab La Rambla.
Máax jma’ache’, tu ya’alaje’ ma’ u yóolo’ob u wáak’al beyo’, táan ka’ach u meyajta’al tuláakal ba’ax ts’o’ok u much’kíinsa’al tia’al u beeta’al jump’éel bomba, tetraoperóxido de triacetona (TATP), u k’aaba’, beyxan ka’jóolta’an beey “la madre de Satán”.
