Katia Rejón
Oochel Raúl Angulo Hernández
K'iintsil
Jo', Yucatán
lunes 2 ti' julio, 2017
Magicon Méridae’ káaj u meyaj ikil tu much’il máax uts tu yicho’ob, yéetel tu je’ek’altaj joonaj ti’ kaaj ka’aj tu ts’aj 11 ja’atskab k’iin ti’ 2 ti’ julio ti’ 2017. Ichil yáax ba’ax tukulta’ab u beeta’ale’, mejen jak’ óolbe’en che’ob, p’óok ku yéeyik tu’ux kun táakpajak máax ku bino’ob cha’ano’, jump’éel ketlam Quiddich, kúuchil tu’ux ku ch’a’abal oochelo’ob, kúuchil u ko’onol jejeláas ba’alo’ob yaan u yil yéetel u ts’ikbalil Harry Potter, bey xan ketlamo’ob, paax yéetel óok’ot.
Le much’táambala’ beeta’ab hacienda Chenkú yéetel ts’ab mejen nook’ najil tu chowakil táankab tu’ux ts’ab xan u chan kisbuuts’il janal. Kex yooxole’ yaan máax bin yéetel u chowak nook’o’ob wáa u bak’maj u kaalo’ob je’el bix ti’ u cha’anil Harry Pottere’, ka’alikil tu pa’atiko’ob u ketlamil cosplay.
P’óok ku yéeyaje’ ku kulkiinsik juntúut máak aktáan ti’e’ ku jáan a’alik tu’ux najil kun xi’ik, ba’ale’ jump’íit máako’ob táakpajoo’obi’ yéetel 80 u p’éelel peeso’ob tu tojoltaj. Yaan máaxo’ob tu bo’oto’ob tak 565 peso’obe’ ma’ béeychaj u laj beetiko’ob ba’ax tu bo’otajo’obi’.
Ya’ab máax k’uche’ tu tukultaj noj ba’al kun úuchuk ba’ale’, ma’ laj anchaj ba’ax tu tukultajo’obi’, séeb xu’up uláak’ ba’alo’ob, taal cháak yéetel jach k’aas bix meyajnajik Marina Huerta máax jo’olint le cha’ana’.
Ba’ale’ máax áantanajo’ob yéetel tu síija u meyajo’obe’, ma’alob ba’ax tu beetajo’ob yéetel tu yilo’ob bix u jáawsiko’ob ba’ax ma’ ma’alobi’ bey xan tu ma’alob k’amo’ob u’ula’abo’ob k’ucho’ob.
