Juan Manuel Contreras
Boonil ch’a’aban ti’ Facebook Calle Estampa
K'iintsil
Jo’, Yucatán
Viernes 30 ti’ junio, 2017
U chan súutul u yich máak tia’al u paktik erotismo, chaknulil yéetel u ki’ óolal u wíinkilal máak, chéen jayp’éel tuukulo’ob ku múuch’ulo’ob tu bak’pachil u ye’esajil [i]Líneas Explícitas[/i], tu’ux táakbesa’an u meyaj 25 aj its’ato’ob sijnáalo’ob ti’ Yucatán yéetel ti’ táanxel lu’umo’ob.
Meyaj táaka’an ti’ e’esajile’, yanchaj tumen beeta’ab jump’éel páayalt’aan tumen u múuch’kabil Colectivo Calle Estampa ikil u kaxantiko’ob u láak’ bix u na’ata’al u yúuchul boon, tumen ku tukultiko’obe’ jump’éel ba’al k’a’anan tia’al máaxo’ob ku meyajtiko’ob gráfica.
Ichil jump’éel k’áat chi’ tsikbal beeta’ab yéetel La Jornada Maya, j-a’alab tumen Clarissa Alamilla yéetel Mauricio Collí, máax tu jóok’saj u xooko’ob ti’ artes visuales tu noj najil xook Universidad Autónoma de Yucatán (UADY), ba’ax yanchaj u seten beeta’al tia’al ka béeyak e’esajil, beyxan bix u ts’áako’ob u yóol erotismo yéetel u boonilo’ob.
“U tuukulile’ le meyaja’, yanchaj tumen taakchaj u ye’esiko’ob bix u yila’al erotismo, le beetik ka jbeeta’ab páayt’aanile’, ma’ j-a’alab mix ba’al uláak’, chéen ts’íibta’ab u t’aanil erotismo tia’al beyo’ u chikpajal jejeláas tuukulo’ob ku yantal le ken a’alak, tu tsikbaltaj Collí.
Jóok’sa’an ka’a jaats ti’ le meyajo’obo’: yáaxe’ yóok’olal bix beeta’an, ts’o’okole’ ba’ax yóok’olal beeta’an.
Beye túuno’, ma’ jach suuk u yu’ubal u tsikbalta’al yóok’olal erotismo, le beetik Collí u k’a’ajsaj yanchaj juntéenak ka’alikil táan u k’a’ayta’al payalt’aane’, yanchaj máax tu k’áataj ba’ax ku yúuchul le kenp’áatak yaan ba’alo’ob ku ta’akal. Le beetik ma’atech u ta’akiko’ob mixba’al, ts’o’okole’ tu éejentajo’ob je’el ba’axak.
Bejla’a 30 ti’ junio u k’iinil u ts’a’abal k’ajóoltbil e’esajil. Te’e súutuko’ yaan u táakpajal aj its’ato’ob ku ye’esa’al u meyajo’ob tia’al u ts’áako’ob junsúutuk tia’al u tsikbalo’ob yéetel máax ken u cha’anto’ob. 8:30 áak’ab ken beeta’al tu kúuchul Calle Estampa, yaan yóok’ol u bejil 60, u xookile’ #582A ichil 73 yéetel 75 tu k’íiwikil u noj kaajil Jo’.
