de

del

Paul Antoine Matos
Oochel Rodrigo Díaz Guzmán
K'iintsil

Jo’, Yucatán
Martes 13 ti’ junio, 2017

Tu noj lu’umil Yucatán yaan kex 40 mil paalal yéetel táankelemo’ob ku meyajo’ob kex ma’ unaji’, tumen ma’ u chuk mix 15 u ja’abilo’obi’, tumen wa beyo’, ma’ tu cha’abal tumen a’almaj t’aan, beey tu ya’alaj máax betik secretario ti’ Trabajo y Previsión Social (STPS), Enrique Castillo Ruz, uchak u máan [i]Día Mundial contra el Trabajo Infantil.[/i]

Tu najil xook Serapio Rendón, Castillo Ruz tu ya’alaje’ u beeta’al meyaj paalale’ j-éem cinco puntos ichil u ja’abilo’ob 2007 tak 2013, ba’ale’ leti’ u ts’ook ja’abil uchik u beeta’al u xookil. Tia’al 2007, u xookile’ ku náakal tak 13.3 por ciento ti’ paalal ku meyaj ti’ Yucatán, ka’alikil ti’ 2010 10.5 u xookil, ts’o’okole’ kamp’éel ja’abo’ob paachile’ 8.4 por ciento.

U xookile’, tu ya’alaj, ku ye’esik yaan kex 40 mil u túul paalal ku meyaj, ti’ le je’elo’obo’, 65 por ciento xiibo’ob; 70 por ciento ku meyajo’ob tu kaajil Jo’ yéetel uláak’ noj kaajo’ob.

Kan jaats ti’ leti’obe’ koonol ku beetiko’ob, 22 por ciento servicio ku ts’áako’ob yéetel 6.7 por ciento ku meyajo’ob ti’ construcción, tu ya’alaj.

Tu ya’alaje’ “a’almaj t’aane’ ku ts’áak u páajtalil u meyaj paalal le ken u chuk 15 u ja’abilo’ob, ba’ale’ yaan jayp’éel ba’alo’ob k’a’anan u beeta’al tia’al ka béeyak. Unaj ma’ u p’atik u xooko’ob, ba’ax ken u meyajto’obe’ ma’ unaj u beetik u ch’éenel u kaambalo’ob. K’a’anan no’oja’an ba’ax ken u beeto’ob, ma’ unaj u meyajo’ob bul áak’abi’ mix u ts’áak tuláakal u muuko’ob ka’ u beet ma’ u ts’o’okol u xuulchajalo’ob je’el bix unaje’”.

Máax beetik delegado federal ti’ STPS ti’ Yucatán, Ricardo Béjar Herrera, tu ya’alaj k’a’anan u kaláanta’al paalal yéetel táankelemo’ob tia’al ma’ u p’atik u xooko’ob mix u kaambalo’ob tia’al u jóok’olo’ob táanil paach k’iin. Tu ya’alaje’ yaan paalal 15 u ja’abilo’obe’, ts’o’okole’ ku meyajo’ob, ba’ale’ láayli’ xan u xooko’ob.