de

del

Lilia Balam
Oochel Rodrigo Díaz Guzmán
K'iintsil

Jo', Yucatán
Viernes 2 ti' junio, 2017

“Mina’an mixba’al ka u yoks ti’ to’ob saajkilil. Tene’ ma’ in wojel ba’ax takpoolil ku beeta’al, le beetik jeets’el in wóol tumen ken ts’o’okoke’ in wojel yaan u luk’sa’al si’ipil tin wóok’ol yéetel tu yóok’ol Andrés Ortiz”, beey tu ya’alaj Jesús Pérez Ballote, máax jo’olbesik u múuch’kabil Comité Directivo Municipal del Partido Acción Nacional (PAN), uchik u bin tu kúuchil Fiscalía General del Estado (FGE) tia’al u xak’alta’al wa yaan ba’al u yil uchik u we’ekel ácido sulfúrico yóok’ol bejo’ob ma’ úuch ku yutskíinsalo’ob tumen u Ayuntamientoil u noj kaajil Jo’.

Ti’ jump’éel k’a’aytaj tsikbale’, Pérez Ballote tun ts’áaj k’ajóoltbil oochelo’ob yéetel jump’éel ta’absaj tsikbal tu beetaj yéetel Roger Moo, ku ya’alale’ juntúul aj meyaj ti’ u mola’ayil Grupo OCME, máax bin tu kúuchil COmité tia’al u beetik jump’éel tak pool yóok’ol óoxtúul aj meyajo’ob ti’ le mola’ay tu’ux ku meyajo’, tumen tu manajo’ob ácido tu kúuchil Servidora Química del Sureste, ts’o’okole’ tu wekajo’ob yóok’ol bej yéetel jump’éel u kis buuts’il Grupo OCME.

Te’e táabsaj tsikbalo’ ku tsikbalta’al tumen Moo bix u beeta’al jejeláas ba’alo’ob ma’ unajo’obi’ tumen le múuch’kabilo’, ts’o’okole’ tu ya’alaj mola’aye’ ku múul meyaj yéetel Sergio Vadillo, máax jo’olbesik despacho ti’ jala’ch Rolando Zapata Bello.

Máax jo’olbesik Comité tu ya’alaj ma’ u yojel ba’axten táan u beeta’al tak pool, ba’ale’ kex beyo’ yaan u náats’al tia’al u ye’esik u jaajil, je’el bix ts’o’ok u ts’áak k’ajóoltbil tu táan kúuchilo’ob k’a’aytaj péektsilo’ob. Ka jk’áata’ab ti’ ba’axten ma’ tu ts’áaj ti’ FGE chéen p’el uchik u k’amike’, tu ya’alajae’ “tumen ts’o’ok u máan k’iin káajak u tukultik u beetik jump’éel k’a’aytaj tsikbal tia’al u ts’áak k’ajóoltbil”.

“In wojel tak pool ts’a’aban tin wóok’ole’, chéen tia’al u náaysal u yóol máak, tia’al beyo’ u ta’akal u jaajil ba’ax táan u yúuchul. Wa béeychaj u k’askúunsa’al bejo’ob tu kaajil Jo’ tumen le sa máaxo’, beeyxan wal je’el u ts’áak u si’ipil máak kex ma’ jaaji’.