Notimex
Oochel Christian Vizl
K'iintsil
Miércoles 26 ti' abril, 2017
Aj ch’a’a oochel Christian Vizl, sijnáal ti’ México, ku jóok’sik oochelo’ob yo’olal kuxtal ku yantal tu taamilo’ob k’áak’náaab, tu náajaltaj u yóox kúuchil ti’ u ketlamil Sony World 2017, tu jaatsil Mundo Natural.
Ti’ le ketlamo’ táakbesa’ab 227 mil 596 oochelo’ob, jats’ano’ob ti’ Paisaje, Vida Cotidiana yéetel Retrato, ichil uláak’o’ob. Máaxo’ob xak’altiko’obe’, tu yéeyajo’ob u jach ma’alo’obilo’ob tia’al u yila’al máax kéen náajalnajak.
Ti’ jump’éel k’áatchi’ tsikbal, Vizl tu ya’alaje’ jach naats’ ti’ jáal ja’ ku máan u kuxtal mantats’. Yáaxe’, ku ka’ansik máak tia’al u báab tu taamilo’ob ja’, ts’o’okole’ tu kanaj u xíinximbalkuns máak ti’ ts’ono’ot, ba’ale’ tak tu ja’abil 2010 káaj u ch’a’ak oochelo’ob.
U meyajil yéeya’ane’ ku k’aaba’tik Silent Kingdom (Xmukul Ajawil), tu yo’olale’ Vizl tu ya’alaje’ yáax juntéen u jóok’sik oochelo’ob yéetel u boonil sepia, ka’ache’ suuk u jóok’sik sak yéetel boox, wa yéetel jejeláas boono’ob.
“Oochelo’obe’ ku ye’esiko’ob kuxtal tu taamilo’ob ja’, jach in yaabiltmaj tumen tin káajsaj in meyajtik lik’ul le ja’ab máaniko’, ts’o’okole’ u boonilo’ob sepia ku jelbesik xan u yóolil oochelo’ob”, tu ya’alaj.
Jump’éel ti’ oochelo’ob ch’a’abane’, jóok’sa’ab tu kúuchil Cabo Pulmo, tu lu’umil Baja California, tu xamanil u noj lu’umil México. Le je’elo’ jump’éel kúuchil kaláanta’an, ts’o’okole’ noj ba’al yanik te’elo’ tumen ya’ab meyajo’ob u beetmaj ikil u kaláantik bix yanik kuxtal te’elo’.
Vizl ku ya’alik u meyaje’, ku kaxantik u péektsiltik ka kaláanta’ak kuxtal ku yantal ich ja’, “óol beey u juum u t’aan k’áak’náab”.
Oochelo’ob yéeyano’obe’ ku ye’esiko’ob tiburono’ob yéetel juntúul Manta Gigante ti’ Islas Revillagigedo, beyxan juntúul teek ti’ Xcalac ti’ Quintana Roo. Máax tu xak’alt oochelo’obe’, tu yéeyajo’ob kex 100 oochelo’ob, jóok’sa’an tumen máako’ob ku taalo’ob ti’ 49 noj lu’umo’ob.
__________________________________________________
[b]Silent Kingdom, fotografía mexicana gana tercer lugar en el Sony World 2017[/b]
El fotógrafo mexicano Christian Vizl, especializado en imágenes de la vida submarina, resultó ganador del tercer lugar en la categoría Mundo Natural de los premios de fotografía Sony World 2017.
Un total de 227 mil 596 imágenes fueron enviadas al jurado que seleccionó lo mejor de la fotografía mundial distribuidas en diez categorías.
Vizl aseguró que su trabajo busca transmitir un mensaje de conservación de los océanos, “ser una voz para el mar”, y buscar nuevos retos.
