Paul Antoine Matos
Oochel Rodrigo Díaz Guzmán
K'iintsil
Jo', Yucatán
Martes 25 ti' abril, 2017
U ba’atelil lucha libre, chéen u piixil u yich aj ba’atelo’ob ku búukintik u nook’o’ob tia’al u wowoch’síit’o’ob je’el bix u beeta’al ti’ circo. Tu k’iinil domingo máaniko’, u k’i’ik’el taataobe’ ku yáalkab tu beel u k’i’ik’el u paalal, u mejenilo’ob ba’atel. Yáax aj ba’atelo’obe’, tíip’o’ob ti’ Polifórum Zamná, ku k’aba’intiko’ob Superpiloto Jr., Comandante Villa yéetel Libra tu ketajuba’ob tu táan Eterno, Jaguar yéetel Kid Cometa; yaane’ wey kajilo’obe’, uláak’o’obe’ ti’ Quintana Roo u taalo’ob. P’el ts’o’okik u k’a’ayta’al u múuch’il técnicos yéetel rudos, ku tíip’il réferis.
Máan yáax ba’atelil; tu ka’ap’éelile’ ku chikpajal Aztlán, máax ku ch’a’ak u yoochel tu tséel juntúul chan paal, láayli’ u ts’áamaj u piixil ich. Tajan ma’alo’ob ba’atel, tu ka’ap’éelil.
Ts’o’okole’ ku chikpajal u paalal ka’atúul aj ba’atelo’ob mix bik’in bíin tu’ubsa’ako’ob, Dos Caras yéetel Octagón, ku ketikuba’ob tu táan Herodes yéetel u paalil Fishman. Máaxo’ob cha’antike’, awatnajo’ob ka tu yilajo’ob u yokol ka’atúul máak yaan u piixil u yicho’ob ch’ooj yéetel dorado, beyxan ninja.
Táan beey le ba’atelo’, yanchaj u k’uchulo’ob tak tu’ux yaan máak ku cha’ano’ob. Ts’o’ok beey u jach ketchajal le ba’atelo’, ba’ale’ tu tsooke’ náajalnaj Dos Caras yéetel Octagón.
U wíinkilal aj ba’atelo’obe’ ku ts’áak k tukulte’, tak to’on je’el u páajtal k beetik deporte. U nak’o’obe’, kex tumen jach nuuktake’, ma’atech u beetik u p’áatalo’ob paachil, tumen láayli’ ku na’akalo’ob tu k’áanilo’ob ring tia’al u síit’o’ob ba’atel. Ts’o’ok beey u jach ketchajal le ba’atelo’, ba’ale’ náajalnaj Dos Caras yéetel Octagón.
Ma’ saajko’ob u loobiltikuba’ob yéetel óoli’ mixba’al. Yanchaj u t’aanil ichil máaxo’ob ku cha’ano’ob yéetel Pirata Morgan, ka j-ila’ab tumen Silver King ma’ tu ka’ap’éel tukultaji’, le beetik jumpuul uchik u síit’ tia’al u lúubsik.
Noj ba’atelile’, yanchaj ichil L.A. Park, u paalil yéetel Super Parka, máaxo’ob ba’atenajo’ob tu táan Rush, Pieroth yéetel La máscara. Ma’ ts’o’okok u k’a’ayta’al u k’aaba’obi’, leti’obe’ ts’o’ok u yokolo’ob ba’atel.
Yanchaj u seten je’echel kóochabo’ob, looxo’ob yéetel laajo’ob; yanchaj u táakpajal referi, ba’ale’ jach keet yaniko’ob; ma’ ojéela’an máax kéen loots’nak. Ba’ale’ tu ts’ooke’, kex tumen ma’ jach ki’imak u yóol máaxo’ob cha’antike’, j-a’alab tumen réferi náajalnaj u múuch’il Rush, Pieroth yéetel La máscara, ka’alikil u p’a’astiko’ob yucateko’ob.
