La Jornada
Oochel Rodrigo Díaz Guzmán
K'iintsil
Progreso, Yucatán
Lunes 17 ti' abril, 2017
Jo’oljeak domingo, tia’al u chan síiskunsik u yóol máake’, ya’abach baatsilo’obe’ tu xíimbaltajo’ob u jáal ja’il Pogreso. Jk’uch kex 80 mil u túul máaki’, beey tu ts’áaj k’ajóoltbil u jo’olpóopil le kaajo’, José Isabel Cortés Góngora.
Ti’ jump’éel k’áatchi’ tsikbal tu beetaj jo’olpóop, tu ya’alaje’, naj ku majáanta’alo’ob yéetel le yaan tu méek’tankaajilo’ob jáal ja’e’, óoli’ tuláakal jchu’upi. Beyxan u kúuchilo’ob báaxal ja’e’, láayli’ ya’abchaj máak bini’; yaane’ ku taalo’ob ti’ uláak’ lu’umilo’ob ti’ México, ba’ale’ yaan xan táanxel tu’ux u taalo’ob.
Beyxan tu ya’alaje’, wa ku ke’etel ka’ap’éel noj k’iino’ob, domingo de pascua yéetel domingo de Ramose’, ku yila’ale’ asab ya’ab máak bin jáal ja’ jo’olje, domingo de Pascua, tumen le máaniko’ k’as je’elan máanik k’iine’, le beetik yanchaj tak u je’elsa’al u meyaj chuk kayo’ob.
Ja’atskab k’iin káaj u k’uchul máak ti’ Malecón Internacional de Progreso, chuup u k’uchul kis buuts’ tak te’elo’ yéetel ma’ tu ch’éenel u máan máak yóok’ol u noj bejil ku ti’ Jo’ tak Progreso, tu ya’alaj.
“Jkoonolo’obe’ jach yanchaj meyaj ti’ob tumen láayli’ jach chuupo’obe’, beyxan ya’ab ba’al ku ma’anal ti’ mercado yéetel uláak’ kúuchilo’ob tu’ux ku ko’onol kay”, tu tsikbaltaj.
Tia’al le domingo ku taala’, ma’ tu pa’atal ka jach cho’obanak tumen tu jo’oloje’, paalalo’obe’ yaan u suuto’ob xook.
___________________________________________________
[b]Más de 80 mil personas en playas de Progreso[/b]
Durante el día de ayer, domingo de Pascua, hubo una afluencia de por lo menos 80 mil personas en las playas de Progreso, consideradas las más importantes de Yucatán, explicó el alcalde, José Isabel Cortés Góngora.
“Fue un buen domingo para los restauranteros que están frente a las playas, hubo llenos en esos sitios, además de la demanda en las pescaderías y los puestos en el mercado municipal”, aseguró el edil.
