Tomás Martín / Notimex
Oochel: Lilia Balam
K’iintsil
Jo’, Yucatán
Martes 10 ti’ abril, 2017
U beeta’al u kúuchil ts’ak yaj Faro del Mayab tu kajil Jo’, yaan u beetik u yantal le ku k’aaba’tik turismo médico, tu xaman lak’inil u noj lu’umil México, beey tu jets’aj máax jo’olbesik Fomento Turístico ti’ Yucatán, Saúl Ancona Salazar.
Ti’ jump’éel tsikbal beeta’ab yéetele’, tu ya’alaj le meyaj ku beetbilo’, jump’éel ti’ u asab nojochil ku yantal ti’ Jo’. Tia’al u beeta’ale’ yaan u k’a’abéetkunsa’al maanal ti’ 500 millones ti’ pesos, yaan u jóok’olo’ob tu k’aaba’ Red Médica Sur. Te’elo’, yaan u yantal 25 especialidades tia’al u ts’a’akal k’oja’ano’ob ku taalo’ob tu noj lu’umil México yéetel ti’ táanxel lu’umo’ob. Yaan u certificarta’al tumen Joint Commission International (JCI) tia’al ka béeyak u ts’a’akal máax ku taal ti’ Estados Unidos yéetel uláak’ lu’umo’ob ti’ yóok’ol kaab.
Ti’ le kúuchilo’ yaan u yantal bolonp’éel u t’o’olil, yaan u ts’a’abal 88 u tu’uk’ilo’ob tia’al consulta, ka’ap’éel quirófano yéetel 66 camas tia’al u chital máak; tuláakal nu’ukulo’obe’ u jach túumbenilo’ob yéetel jets’a’an no’ojano’ob tia’al le meyajo’.
U k’áaxil kúuchil ts’ak yaje’, yaan u beeta’al ti’ Santa Gertrudis Copó, yaan u p’isik 15 mil metros cuadrados. Le je’ela’, leti’ u kanp’éel kúuchil bíin táakbesa’ak ti’ Red Médica del Sur.
Acona Salazar, tu yala’aje’, táan u pa’atal ka yanak mola’ayo’ob ti’ táanxel lu’umo’ob ka u k’ubo’ob taak’in tia’al u meyaj, tumen tu ja’abil 2015 tu cha’anil comercio beeta’ab ti’ Canadá, jach k’a’ayta’ab yaan u beeta’al ti’ Yucatán jump’éel noj meyaj tia’al ka béeyak u ts’a’akal k’oja’ano’ob ti’ táanxel lu’umo’ob. Le beetik xan yanchaj jump’éel kúuchil ti’ Internet ku k’aaba’tik Yucatán Health Care, ku páajtal u xak’alta’al ti’ www.yucatanhealthcare.com, tu’ux ku k’a’aytal aj ts’ak yajo’ob yéetel kúuchilo’ob ts’ak yaj tia’al beyo’ u yila’al ba’ax seen yaan ti’ le baanta je’ela’. Beyxan, lik’ul 2014, u lu’umil Yucatán j-je’ets’ tumen ProMéxico beey jump’éel ti’ le lajka’ap’éel kúuchilo’ob tu noj lu’umil México yaan u páajtalil u ts’akik máako’ob ku taalo’ob ti’ uláak’ lu’umo’ob, je’el máako’ob ti’ Estados Unidos, Canadá yéetel Belice, ichil uláak’o’ob.
