Hubert Carrera Palí
Oochel: Fernando Eloy
K'iintsil
Kaanpech
Jueves 19 ti' enero, 2017
Yanchaj u máan bulukp’éel ja’abo’ob tia’al ka suunak tu’ux kaxata’ab u noj e’esajil maaya miaatsil, u yúuchben piix ichil ya’ax tun ti’ Calakmul. Majáanta’ab tia’al u ye’esa’al tu kúuchil cha’an La Soledad ti’ le kaajo’, tumen tia’alinta’ab tumen juntúul nojoch ajaw ti’ u ch’i’ibalil Kaan.
Claudia Elena Escalante Díaz, máax jo’olbesik museos ti’ Kaanpeche’, tu ya’alaj yanchaj u bo’otal tumen INAH, 350 mil peso’ob tia’al ka béeyak u k’a’amal tumen le kúuchilo’.
U ya’ax tun piix ichil Calakmul, yáax ila’ab tumen aj xak’al xook William Follán, 12 ti’ diciembre ti’ u ja’abil 1985. Ti’ yaan tu kúuchil estructura VII ti’ le úuchben kaajo’. Ku tukulta’ale’ yanchaj ichil u ja’abil 500 yéetel 650 d.C.
Tu táane’, ku chikpajal u yich juntúul xiib, u ni’ yéetel u chi’e’ jatsa’an tu beel; ts’a’aban u tu’uk’il u yich yéetel obsidiana, yóok’ol xiximo’ob.
