La Jornada Maya
Oochel: Afp
K'iintsil
Ciudad de México
Martes 30 ti' junio, 2020
Ka jts’o’ok u ts’a’abal k’ajóoltbil jayp’éel e’esajilo’ob, cha’anob, u tsolnu’ukil u bonik máak u yich, bix je’el u péeksik máak u wíinkilal yéetel xan u tsoolil jayp’éel k’aayo’ob meyajnaja’an ti’ cha’an u beetamajo’ob ti’al u chan náaysik u yóol máaxo’ob u k’almajubáajo’ob tu yotoch ti’al u kaláantikubáajo’ob ti’ u k’oja’anil COVID-19e’, u múuch’il cha’an Cirque du Soleile’ tu ts’áaj k’ajóoltbile’ mina’an taak’in ti’al u ch’a’ajoltik u meyaj.
“Ti’ u ts’ookil 36 ja’abo’ob ts’o’ok u máano’oba’, Cirque du Soleile’ k’ajóolta’ab beey máako’ob jeets’el u meyajo’ob ti’al u beetiko’ob u suut taak’in yéetel cha’anob ku ye’esiko’ob.
Ba’ale’, jp’áat ma’ táan u náajaltiko’ob jach mix jump’íit taak’in úuchik u yantal u laj k’a’alal ba’al yóok’lal COVID-19, le beetike’ máaxo’ob jo’olbesike’ yanchaj u kaxtik ba’al u beetej ti’al u paach le mola’ayo’”, beey tu ya’alaj Daniel Lamarre, máax jo’olbesik múuch’kabil.
Mola’ay jeets’el tu noj kaajil Montreal, Canadá, ku k’áatik ti’ máaxo’ob u k’ubmajo’ob taak’in ti’al u meyaj ka’ache’ ka tsikbanlako’ob ti’al u ch’a’ako’ob mokt’aan yéetel Investissement Québec, ti’al beyo’ “u táakmuk’ta’al ti’al u líik’il yéetel ya’abach muuk’ tuka’atéen”; beey úuchik u ya’alal ti’ k’a’aytajil ts’íib jts’a’ab k’ajóoltbil.
