Carolina Gómez Mena
Oochel: Efe
K'iintsil
Mérida, Yucatán
Lunes 29 ti' junio, 2020
Te’e k’iino’oba’ unaj ka’ach u beeta’al XLII Marcha del Orgullo LGBTTTI, ba’ale’ yóok’lal táan u máan u k’oja’anil COVID-19, yanchaj u beeta’al chéen digital. “Ma’ táan u ch’éenel klíik’sik kt’aan, táan kk’iimbesaj ba’ale’ yéetel Susana Distancia”, beey a’alab tumen jaytúul ti’ le máaxo’ob tu much’ajubáajo’ob ti’ Internet. Líik’saj t’aane’ páatchaj u cha’antal ti’ u redes socialesil jayp’éel múuch’kabilo’ob yéetel máako’ob ku péektisltiko’ob ka chíimpolta’ak u jaatsil máako’oba’, ba’ale’ beyxan ti’ kúuchilo’ob tu’ux ku k’a’aytal péektsilo’ob.
Yanchaj u beeta’al beey digitalo’ ti’al u kaláanta’al u toj óolal máak, tumen beyo’ ma’ táan u pa’ak’al u k’oja’anil SARS-CoV-2. Le beetike’ máaxo’ob ku táakmuk’tiko’ob ba’ax k’ajóolta’an beey diversidad sexual, beyxan áaktibiistaob, mola’ayo’ob péektsiltik u páajtalil wíinik ti’ u lu’umil México yéetel uláak’ táanxelilo’obe’ tu jach mu’uk’ankúunsajo’ob t’aan ti’al u k’áatiko’ob ka chíimpolta’ak tuláakal máaxo’ob jóolméek’tano’ob tumen diversidad sexual, ti’al ma’ u péech’óolta’alob yéetel ti’al xan u éejenta’al ka páatak u yutsil k’a’amal tumen a’almaj t’aan tuláakal máax u k’áat kuxtal beyo’.
Tuláakalo’obe’, tu k’áatajo’ob ka ch’éenek u beeta’al k’aasil ba’alo’ob tu yóok’olo’ob, chéen tumen p’ekta’anob, beyxan tu k’áatajo’ob ka ts’a’abak u si’ipil máaxo’ob p é e c h ’ ó o l t i k o ’ o b , loobiltiko’ob yéetel ku kíinsiko’ob LGTB máako’ob chéen tumen yaanal ba’ax uts tu yicho’obi’.
