Rosario Ruiz y Abraham Bote
Oochel: Sasil Sánchez Chan
K'iintsil
Mérida / Playa del Carmen
Viernes 26 ti' junio, 2020
Te’e k’iino’ob máana’, u jala’achil u lu’umil México, Andrés Manuel López Obrador tu k’a’aytaj juntúul máasewal ko’olel máax ken u jo’olbes u mola’ayil Consejo Nacional para Prevenir la Discriminación (Conapred), “tumen leti’e’ kaaj ku asab péech’óolta’alo’”, le beetike’ jejeláas múuch’kabilo’obe’ ts’o’ok u ts’áako’ob k’ajóoltbil jayp’éel k’aaba’ob ti’al u chíimpolta’alob u ti’al.
Junmúuch’ ko’olelo’obe’ tu much’ajubáajo’ob ti’ Frente Plural de Mujeres Indígenas por la Titularidad del Conapred, tu’ux táaka’an Red Nacional de Abogadas Indígenas, Asamblea Nacional Política de Mujeres Indígenas, Coordinadora Nacional de Mujeres Indígenas, Red Nacional de Casas de las Mujeres Indígenas yéetel Mujeres Colibrí Colectiva Lésbica Indígena.
Ichil máaxo’ob ku tukulta’al je’el u páajtal u jo’olbesik u mola’ayil ti’ yaan xyukatekail Fátima Gamboa Estrella, xguerrerenseil Martha Sánchez Néstor yéetel x-oaxaqueñail Marcelina Bautista Bautista, ba’ale’ ma’ chéen leti’obi’, yaan uláak’ máasewal ko’olel tukulta’an no’ojanob ti’al meyaj te’e mola’ayo’.
Múuch’kabile’ ku k’áatik ti’ jala’ach “ma’ u beeta’al mixba’al tu yóok’lalo’ob wa mina’anoni’, le beetik kk’áat táakpajal yéetel klíik’sik kt’aan le ken yéeya’aktumen Secretaría de Gobernación (Segob) yéetel jala’ach, máax ken u jo’olbes Conapred.
