Reuters
Oochel: Afp
K'iintsil
Quito, Ecuador
Jueves 18 ti' junio, 2020
Te’e k’iino’oba’, páatchaj u cha’abal kex 15 u túul nukuch áako’ob ts’o’ok u yúuchtal k’a’alako’ob. Ti’ jáalk’abta’abob tu petenil Galápagos úuchik u jach kaláanta’al ma’ u ch’éejel le ba’alche’a’, tumen walkila’ yaan kex 2 mil túulali’, ts’o’okole’ táan u bin u ya’abkunsikubáajo’ob, beey tu ts’áaj k’ajóoltbil le martes máanika’ u kúuchil Parque Nacional Galápagos.
Juntúul ti’ le áak ch’a’ak’abta’ab te’e españolail petenile’, juntúul xibil áak Diego u k’aaba’, ts’o’okole’ yaan kex 100 u ja’abil, ba’ale’ leti’e’ jach k’ajóolta’an tumen jach ma’alob u núup’ul ti’al u yantal mejen áako’ob, tumen ka’alikil k’ala’antako’obe’ tu múul beetaj u yabtal kex 800 u túul u mejen áakilo’ob [i]Chelonidis hoodensis[/i].
“Mantats’ máanja’an táanil”, beey tu ya’alaj Freddy Villalva, juntúul gúuardaparke tu kaláantaj le áako’ ichil u yáalkab 17 ja’abob. “To’one’ k-ojel tu yóok’lal Diegoe’ páatchaj u líik’il tuka’atéen le jaatsil áaka’ tumen jach ta’aytak u ch’éejel ka’achij, tu ya’alaj”.
