Armanado G. Tejeda
Oochel: EP
La Jornada Maya
Madrid, España
Miércoles 10 ti' junio, 2020
Pau Donés, máax ku k’aay ka’ach yéetel ku ts’áak u yóol ti’ u múuch’paaxil pop-rock ich káastelan t’aan Jarabe de Palo, jkíim jo’oljeak martes. 53 u ja’abil ka’achij, yéetel táan ka’ach u ba’atel ti’al u p’itik u k’oja’anil cáncer tsa’ay tu koolon, ba’ale’ jach k’aas úuchik u tsa’ayal ti’.
Láak’inta’an tumen u láak’o’ob ka’aj kíim tu lu’umil Pirineos, tu chan catalanail kaaj Vielha (Lleida). Tak ma’ seen úuchake’, tu ts’áaj k’ajóoltbil yaan u jóok’sik jump’éel túumben disco, ts’o’okole’ tu k’a’aytaj xan yáax táabsajil paax tu beetaj ti’ le meyajilo’, tu k’aaba’taj Eso que tú me das, tu’ux páatchaj u yila’al jach lik’a’an u yóol.
Juntúul máak jach k’ajóolta’ab u juum u t’aan ti’al u ts’o’okbal u ja’abilo’ob noventa, yéetel ti’al u káajbal siglo XXI.
K’aayo’ob tu beetaje’ jach u’uyabo’ob, ts’o’okole’, yanchaj uláak’o’ob óoli’ tuláakal tu’ux ku k’a’ayal, je’el bix Flaca, ba’ale’ ti’ u ts’ook ja’abil u kuxtal Pau Donése’ jach chíimpolta’ab yóok’lal bix tu ts’áaj u muuk’ tu táan k’oja’anil tsa’ay ti’.
