Sputnik
Oochel: Colección de la Autoridad de Antigüedades de Israel
K'iitnsil
Jerusalén, Israel
Jueves 4 ti' junio, 2020
Junmúuch’ u ajxak’al xookilo’ob Museo de Israel tu beetajo’ob meyajo’ob ti’al u ye’esiko’ob yanchaj u xíiwil cannabis beyxan íinsiensóo ti’ u yalabil ba’alob kaxta’ab tu yúuchben ki’ilch kúuchil Tel Arad (Israel).
Xak’al xook beeta’ab ti’ ka’ap’éel áaltaro’ob yaan ichil jump’éel kili’ich kúuchil beeta’ab ichil u ja’abil 750 yéetel 715 a. C., tu’ux ts’o’ok u yila’ale’, cannabis je’el bix xan íinsiensoe’, k’a’abéetkunsa’ab tu súutukil u beeta’al payalchi’ob kex 2 mil 700 ja’abo’ob paachil.
Te’e kúuchilo’ kaxta’ab ka’ap’éel áaltaro’ob, jump’éel chichan yéetel uláak’ chaan nojoch. Ti’ tu ka’ap’éelal kaxta’ab u yalabil le ka’ap’éel ba’alo’oba’, ka’aj túun biinsa’abo’ob ti’al u xak’alta’alo’ob tu beel. Beey túuno’, chikpaje’ le ba’ax kaxta’ab ti’ le chichano’ yaan u yalabil cannabis xa’ak’tan yéetel u ta’ juntúul ba’alche’, ka’alikil te’e nojocho’ ila’ab yaan u yalabil íinsiensóo yéetel u tsaatsel ba’alche’, ku tukulta’ale’ xa’ak’ta’ab beyo’ ti’al u séeb sa’ap’al.
