Abraham Bote
Oochel: Presidencia
La Jornada Maya
Mérida, Yucatán
Miércoles 3 ti' junio, 2020
Jo’oljeak 2 ti’ junioe’, u jala’achil u noj lu’umil México, Andrés Manuel López Obrador, tu jo’olbesaj u káajsa’al u meyajil u yóox jaatsil Tren Maya, tu noj kaajil Maxcanú, Yucatán, tu’ux tu ya’alaje’ ts’o’ok u jach ila’al u k’aasil ti’ talamchajo’ob ila’ab yóok’lal taak’in ichil u k’iinilo’ob táan u máan u k’oja’anil COVID-19. “Ts’o’ok kp’isik pandemia”, tu ya’alaj.
U jala’achil u lu’umil Yucatán, Mauricio Vila Dosal, tu ya’alaj k’a’anan le meyaja’ tumen “jach ma’alob u k’iinil táan u k’uchul”, tumen tu ya’alaj yéetele’ yaan u páajtal u beeta’al u suut t’aak’in ichil le lu’uma’, ts’o’okole’ yaan xan u beetik u yantal taak’in, tumen jach k’a’abéet yaan ka’alikil táan u máansa’al talamilo’ob yóok’lal pandemia, tumen ma’ chéen ti’ u toj óolal wíinik ts’o’ok u talamkúunsik ba’al, beyxan ti’ bix u yúuchul náajal.
“Tren Maya jump’éel meyaj ku jo’olbesik ka jeel béeyak u suut taak’in ti’ Yucatán, yéetel ti’ u noojol lak’inil México, jach sáasil yanik ya’abach utsil ba’al ken u taas ti’ bix u yantal taak’in Yucatán; jump’éel ba’al yaan u beetik u yantal meyaj ichil jejeláas u jaatsilo’ob tu’ux ku páajtal u yantal, ts’o’okole’ yaan xan uláak’o’ob ku yantal tu bak’pachili’”, tu ya’alaj Vila Dosal.
