Juan Manuel Contreras
Oochel: Reuters
K'iintsil
Mérida, Yucatán
Lunes 18 ti' mayo, 2020
Pandemia táan u máan te’e k’iino’oba’ taal u “líilja’at gasolina” ti’ talamil yaan ichil LGBTTTI kaaj, tumen le je’elo’ ma’atech u ch’éenel u yantal ichil u kuxtalo’ob, ba’ale’ ku asab chikpajal péech’óolal yaan sáansamal tu yóok’lalo’ob, beey tu ya’alaj Alex Orué, juntúul j-activista ku péek yóok’lal u páajtalil ba’ax k’ajóolta’an beey diversidad sexual, úuchik u t’aan tu máank’inal Día Internacional Contra la Homofobia.
Alexe’ ku tukultik ma’ ya’ab ts’o’ok u k’éexel ti’ le bix yaniko’ob le ja’ab máaniko’, ts’o’okole’ ma’ xaan wa ts’o’ok u chan maas k’astal ti’ le bix yanik ka’acho’, tumen tu k’a’ajsa’aj úuchik u je’ets’el -ma’ chéen juntéenal; ka’atéen- tumen Congreso del Estado ma’ táan u páajtal u ts’o’okol u beel xiib yéetel xiib, wa ko’olel yéetel ko’olel, tumen le je’el xano’, ku kúulpacht’antik ba’ax jeets’el ti’ federal a’almajt’aan tu yóok’lal, le beetik leti’e’ ku tukultik “xma’ u’uyaj t’aan tu táan a’alamajt’aan”.
Tu yaj óoltaj mina’an u yóol máak ti’al ka yanak políticas tu’ux ka táakbesa’akob, tumen ti’ Consejo Estatal Contra la Discriminación “yaan jump’éel ju’un táakmuk’tik, ba’ale’ ma’ táan u beeta’al mixba’ali’”, tu ya’alaj Alex, máax xan ku beetik u consejero cuidadanoo’ ti’ le múuch’kabilo’.
