K'iintsil
Oochel: Afp
Madrid, España
Martes 28 ti' abril, 2020
Te’e k’iino’oba’, ya’abach u kajnáalilo’ob yóok’ol kaabe’ láayli’ u k’almajubáajo’ob tu yotocho’ob ti’al u kaláantikubáajo’ob ti’ u pak’be’en k’oja’anil COVID19, tumen tak walkila’ ts’o’ok u yantal ya’abach máak k’oja’anchajak yéetel yaan xan uláak’o’obe’ ts’o’ok u sa’atal u kuxtal tu yóok’lal.
Ba’ale’ yaan tu’uxe’, kex ts’o’ok u máansa’al talamile’, táan u káajal u jóok’olo’ob tuka’atéen, wa táan u chan káajal u yutstal ba’al. Je’el bix úucha’an tu noj kaajil Wuhan, China, tu’ux síij le k’oja’ana’, tumen walkila’ ts’o’ok u p’áatal mina’an mix juntúul máak oksa’an tu kúuchil ts’akyaj yóok’lal COVID19. U ts’ook 12 u túul p’aatal ka’ache’ ts’o’ok u jóok’sa’al, beey úuchik u ya’alal tumen u aj meyajilo’ob toj óolal Hubei.
Beyxan, Nueva Zelandae’ a’alab tumen yáax ministra Jacinda Arderne’, tu ya’alaj béeychaj u máano’ob yóok’ol coronavirus tumen ts’o’ok u p’áatale’, ti’ mix máak páak’ le k’oja’ano’ob ichilo’obi’. “Ts’o’ok k máan táanil ti’”, tu ya’alak ka’alikil yanchaj u máan jo’op’éel semanas u k’almajbáaj kaaj.
Tu lu’umil Colombiae’ páatchaj u jóok’olo’ob tuka’atéen máaxo’ob ku meyajo’ob ti’ líik’saj najo’ob yéetel jbeet pak’il najo’ob, tu jo’oloj 33 k’iino’ob, ts’o’okole’ jts’a’ab u tsolnu’ukil ti’ob ti’al u páajtal u jóok’olo’ob.
