Sputnik
Oochel: leslu.com.ar
K'iintsil
Argentina
Jueves 23 ti' abril, 2020
Jbeet balts’am yéetel jbeet che’ej síij tu lu’umil Argentina, Marcos Mundstock, máax beetik u tsikbalil ichil u múuch’il Les Luthiers, jkíim le miércoles máanika’. 77 u ja’abil ka’achij, yéetel ts’áab ojéeltbile’ talamachaj ba’al ti’ yóok’lal jump’éel k’oja’an tu yojéelta’aj tsa’ay ti’ tu ja’abil 2019.
“Maanal ti’ jump’éel ja’ab tu ketaj le k’oja’ano’, ba’ale’ ma’ jump’éel ba’al utschaji’, le beetike’ k láak’ Marcose’, binij”, beey tu ts’áaj k’ajóoltbil u yéet meyajo’ob ti’ jump’éel k’a’aytajil ts’íib.
Síij tu ja’abil 1942, tu kaajil Santa Fe.
Mundstocke’ síij ichil u puksi’ik’al jump’éel baatsil taalo’ob ti’ Rava-Ruska, jump’éel u chan kaajil Galitzia, tu lu’umil Europa, ba’ale’ walkila’ k’ajóolta’an beey Ucrania.
Tu kanaj t’aan ti’ radio, tu beetaj balts’am yéetel ts’íib balts’am; Mundstocke’ leti’ máax patjo’olt u múuch’il Les Luthiers tu ja’abil 1967 yéetel leti’ u yóoxtúul máak ku kíimil ti’ u múuch’il Les Luthiers. Yáax táanile’ jkíim Gerardo Masana tu ja’abil 1973, ka’alikil 36 u ja’abil, ts’o’okole’ sa’at u kuxtal Daniel Rabinovich tu ja’abil 2015, 71 u ja’abil ka’achij.
