Afp
Oochel: Yazmín Ortega Cortés
K'iintsil
París, Francia
Viernes 17 ti' abril, 2020
U k’alikubáaj máak tu yotoch jayp’éel winalo’obe’ ma’ táan u ch’éejsik jumpuul u túumben k’oja’anil coronavirus, COVID-19, ts’o’okole’ yaan u k’e’ebéetchajal u jatsikubáaj tuka’atéen máak tu yotoch ti’al u ja’abil 2022, ti’al beyo’ ma’ u jach chu’upul u kúuchilo’ob ts’akyaj, beey úuchik u ya’alal timen u aj xak’al xookilo’ob Universidad Harvard ti’ u lu’umil Estados Unidos, máaxo’ob xan tu ts’íibtajo’ob bix u tukultiko’ob yaan u xíimbal pandemia.
Xak’al xooke’ beeta’ab úuchik u yantal u jach ka’anan xookil máako’ob k’oja’anchajo’ob yéetel COVID-19 tu lu’umil Estados Unidos, ts’o’okole’ noj kaajo’obe’ táan u chan p’atiko’ob paachil ba’ax jets’a’an ti’al u kaláanta’al u toj óolal kaaj.
Bej tukulta’ab yaan u xíimbalta’al tumen k’oja’ane’, beeta’ab yéetel u yáantajil computadora, u múuch’ meyajil Harvarde’, tu ts’áaj k’ajóoltbil ba’ax tu yilajo’obe’ ti’ u pik’il ju’unil Science, tu’ux a’alabe’ COVID-19 yaan u p’áatal chéen estacional, je’el bix u yúuchul yéetel uláak’ coronaviruso’obo’, tumen asab ya’ab u pa’ak’alo’ob le ken ke’elak.
