Diana Manzo
Oochel: Tomada de redes sociales
K'iintsil
Oaxaca, Oaxaca
Jueves 16 ti' abril, 2020
Tu k‘iinil jo‘oljeake‘, yéetel u ts‘íibil #AguaParaAyutlaYA yanchaj aj boono‘ob yéetel uláak‘ aj ts‘íibo‘obe‘ tu nup‘ajubáajo‘ob ti‘ redes sociales ti‘al u chikbesiko‘ob jach táaj k‘a‘abéet u ts‘a‘abal ja‘ tu mixeil kaajo‘ob San Pedro yéetel San Pablo Ayutla, tu noj lu‘umil Oaxaca, tumen k‘a‘abéet xan u yojéelta‘ale‘, jala‘acho‘obe‘ ma‘ u beeto‘ob mix ba‘al tu yóok‘lal.
Boono‘ob yéetel ts‘íibo‘ob beeta‘ab u ti‘ale‘, chikpajo‘ob yéetel #Ilustratona; te‘e péeksajil yanchajo‘ táakpaj xan x k‘aay Julieta Venegas, x mixe lingüista Yásnaya Aguilar, beyxan j ts‘íib Juan Villoro, máaxo‘ob tu k‘áatajo‘ob ti‘ u jala‘achilo‘ob le kaajo‘ yéetel u noj lu‘umil México ka u ts‘aatáanto‘ob ba‘ax najmal u beeta‘al ti‘al ka yanak ja‘ te‘elo‘.
U mola‘ayil Comisión Nacional de Derechos Humanos (CNDH) tu ts‘áaj k‘ajóoltbil ts‘‚o‘ok u jets‘ik k‘a‘anan u ts‘aatáanta‘al ja‘ ti‘ le kaajo‘oba‘, tumen mix táan u páajtal u p‘o‘ok u k‘abo‘ob je‘el bix a‘alanil tumen u mola‘ayilo‘ob toj óolal ka‘alikil táan u máan u k‘oja‘anil COVID-19.
