AFP
Oochel
K'iintsil
Nueva York, Estados Unidos.
Miércoles 4 ti' marzo, 2020.
Ka’atúul ko’olel meyajtik jump’éel ba’al ku ya’alal chéen xiibo’ob beetik, x irlandesaob Yvonne Farrell yéetel Shelley McNamara, chíimpolta’abo’ob le martes máanika’ yéetel u jach k’a’anan chíimpolalil Pritzker, le je’ela’ leti’e’ tukulta’an keet yanik yéetel premio Nobel de la arquitectura, ba’ale’ ko’olelo’obe’ chíimplta’abo’ob yóok’lal u no’oja’an meyajilo’ob yéetel tumen jach ts’o’ok u kaniko’ob u táakbesiko’ob ba’ax yaan ti’ yóok’ol kaab tu súutukil táan u tukultiko’ob u beetiko’ob le wa ba’axo’.
Leti’obe’ x ka’ansajo’ob yéetel u x áarkitektailob Dublín, káaj u múul meyajo’ob tu ja’abil 1970, Farrell yéetel McNamarae’ “ku beetiko’ob u yantal kúchilo’ob túumbentak ba’ale’ beyxan tu’ux ku chíimpolta’al tuláakal ba’al, ma’atech u p’atiko’ob paachil tuláakal ba’al yanchaj táanil ti’ to’on yéetel tu kanajo’ob u líik’sik kúuchilo’ob páate’ yéetel tuláakal ba’ax yane’”, beey ts’íibta’ab ti’ k’a’aytajil ts’a’ab k’ajóoltbil tumen Fundación Hyatt, múuch’kabil k’ubik chíimpolal.
Yáax juntéen u k’u’ubul ti’ ka’atúul ko’olel u chíimpolalil Pritzker
"Yáax ko’olelo’ob táan u meyajtiko’ob ba’al a’alan chéen u ti’al xiib, sáasilo’ob ti’ uláak’ ko’olel ti’al xan u xíimbaltiko’ob u bejil meyaj je’el bix letiobe’”, beey tu ya’alaj jurado.
- "Noj ba’al" -
"Árkitekturae’ je’el u páajtal u na’atal beey jump’éel ti’ le meyajo’ob asab talam yéetel k’a’anan yaan yóok’ol kaab”, beey tu ya’alaj Farrell úuchik u ts’a’abal k’ajóoltbil ti’ yaan u ts’a’abal chíimpolal ti’.
“In beetik in áarkitektaile’ jach noj ba’al. In náajaltik le chíimpolala’ ku taal u táakmuk’t u jach jats’utsil meyajil áarkitektura”, tu ya’alaj.
Ka’atúul ko’olelo’obe’ u patjo’oltmajo’ob kúuchilo’ob ti’al kaaj, miatsil yéetel kaambal je’el bix u najil xook Universidad de Ingeniería y Tecnología (UTEC) ti’ u noj kaajil Lima, tu ja’abil 2015, je’el bix xan uláak’ kúuchilo’ob ti’al u kajtal máak, tumen ku múul k’a’abéetkunsiko’ob ba’ax yaan yóok’ol kaab yéetel xan u jats’utsil.
“U meyaje’ k’a’anan, túumben yéetel mix juntéen ku ka’ap’éelchajal, yaan u yóolo’ob”, beey a’alab tumen Fundación Hyatt.
Jump’éel ti’ u noj meyajo’obe’ leti’ u kúuchil UTEC, tu múuch’kajtalil Barranco, tojil líik’sa’al ti’ jump’éel k’éech lu’um. Te’elo’ ku yokol u síis iik’il Pacífico, le beetik ma’atech u jach k’a’abéetkunsa’al aire acondicionado. Beyxan tu kanajo’ob u ch’a’anuktiko’ob sáasil yéetel bo’oy ti’al ma’ u jach k’a’abéetchajal kóorrientée.
“Le bix u meyajtiko’ob áarkitekturae’ jach ku beetiko’ob yéetel u jaajil u yóolo’ob, ts’o’okole’ ku chikbesik bix u na’atiko’ob u patjo’olta’al pak’il ba’al yéetel bix je’el u páajtal u líik’sa’al mejen yéetel nojoch kúuchilo’ob”, a’alab tumen jurado.
Uláak’ meyajo’ob u beetmaje’ ku chikpajal ti’ Universidad Luigi Bocconi, Milán; u najil xook Escuela de Economía, Toulouse; London School of Economics; Instituto de Minas-Telecom ti’ u kaajil París yéetel Instituto Urbano, Irlanda.
"Dentro del ethos de una profesión como la nuestra, muchas veces hemos luchado para encontrar un espacio para implementar valores como el humanismo, el oficio, la generosidad y la conexión cultural con cada lugar y cada contexto en el cual trabajamos", dijo McNamara.
