La Jornada Maya
OOchel Instagram @Malala
K'iintsil
México.
Miércoles 26 ti' febrero, 2020.
X lóobayen ch’úupalalo’ob Greta Thunberg yéetel Malala Yousafzai, máax yaan 17 yéetel 22 u ja’abilo’obe’, tu k’ajóoltajubáajo’ob tu noj najil xook Universidad de Oxford, úuchik u bin tsikbal Thunberg yéetel xoknáalo’ob te’elo’.
Yousafzai, máax ku meyaj ti’al u ts’aatáantik u páajtalilo’ob wíinik, yéetel máax táan xan u xokik poliitikáaj, folosofiáa yéetel éekonomiae’ te’e najil xooko’, tu ts’áaj k’ajóoltbil tu k’ajóoltaj Thunberg úuchik u na’aksik ti’ Instagram (@MALALA) tu’ux tu na’aksaj jump’éel u yoochel tu’ux ku chikpajalo’obi’.
Te’elo’ ts’íibta’ab xan: “Níib óolal @gretathunberg", ka’alikil ti’ Twittere’ tu ya’alaj: "Chéen yóok’lal leti’ je’el u p’áatal ma’ in bin xooki’”.
Beey túuno’, Thunberge’ tu ts’íibtaj ti’ Twitter “Beey túuno’... bejla’e’ tin k’ajóoltaj máax kin chíimpoltik yóok’lal ba’ax ku beetik yéetel in k’áat in beetik ba’al je’ex u beetmajo’. Ba’ax uláak’ je’el u páajtal in k’áatike’”.
Beyxan, ti’ Instagrame’, ts’a’ab k’ajóoltbil tumen Alan Rusbridger, leti’e’ máax jo’olbesik Lady Margaret Hall, Greta Thunberge’ tsikbalnaj yéetel xonáalo’ob yóok’lal its’at, tak tu’ux unaj u náakal líik’saj t’aan yéetel yéeyajil.
Oochelo’obe’ tu beetajo’ob u yantal jejeláas ts’íibo’ob ti’ redes sociales tu’ux ku k’áat óolta’al ka yanak alab óol, je’el bix: “Níin óolal tumen te’ex u x k’atunil ko’olel k’a’abéet to’on ti’al u yantal to’on alab óol”, “Alab óol: ti’ yóok’ol kaabe’ k’a’abéet ko’olelo’ob je’el bix teech”.
