La Jornada Maya
Oochel Bentley
K'iintsil
Jo', Yucatán.
Viernes 14 ti' febrero, 2020.
Bacalar, jump'éel modelo GT jach tu p'iis beeta’anile’, yaan u káajal u beeta’al tumen división Mulliner de Bentley, ti’ kis buuts’e’ ts’a’aban u k’aaba’ u yáak’alil Bacalar (u yáak’alil ukp’éel u boonil), Quintana Roo.
“Ba’axten túun Bacalar. Ja’ yaan tu noj lu’umil Quintana Roo k’ajóolta’an xan beey u yáak’alil ukp’éel boonile’ tumen jejeláasil u boonil ch’ooj ku yantali’. ¡Kex pixa’ane’ ku páajtal k na’atik máakalmáak u boonil!”, beey úuchik u ts’íibta’al tu kúuchil Internet Goodwood Festival of Speed de West Sussex, Reino Unido.
Kis buuts’e’, yaan u ts’a’abal k’ajóoltbil ichil u cha’anil Auto Show yaan u beeta’al tu noj lu’umil Ginebra, ichil u k0iinil 5 tak 15 ti’ marzo. Beeta’ab yéetel jejeláasil ba’alo’ob ma’atech u jach loobiltiko’ob yóok’ol kaaab, ts’o’okole’ xa’ak’tan yéetel jump’éel u diseñoil “Centenary Concept Car”, beey ts’íibta’an tumen mola’ay beetmajil.
Mullinere’ tu ya’alaje’ cheen 10 wa 12 u p’éel u kiis buuts’ilo’ob Bacalar yaan u beeta’al, beyxan yaan u ts’a’abal u páajtalil u ts’a’abal jayp’éel ba’al bíin k’áata’ak tumen máax ken ue manej, tu p’iisil yéetel le bix ken k’áata’ake’. Tuláakale’ yaan u tojoltik kex 2 millonesil dólares. Yéetel le kiis buuts’a’ Bentleye’ táan u kaxtik u patjo’oltik túumben kiis buuts’o’ob ti’al u paach k’iinil, le beetik Bacalare’ chéen u yáaxil jayp’éel uláak’o’ob.
Modeloil GT yaan u ts’a’abal u motoril W12, 6.0 litros, yéetel u 626 u muuk’il u yáalkab, beyxan leti’e’ yáax kiis buuts’ beeta’an tumen Mulliner lik’ul u ja’abil 2002.
