Sputnik
Oochel Ch’a’aban ti’ voice.baidu.com
K'iintsil.
Pekín, China.
Martes 11 ti' febrero, 2020.
Jump’éel túumben nu’ukbesaj, ti’al u meyaj ti’ céelularo’ob, beeta’ab tumen u mola’ayilo’ob toj óolal yéetel téeknologiae’ ku ts’áak u páajtalil u yojéelta’al tumen kajnáalo’obe’ wa ts’o’ok u kóojolo’ob ti’ máako’ob yaan ti’ob u k’oja’anil coronavirus 2019-nCov, ti’al beyo’ ma’ u cha’ak u pa’ak’al ti’ob xani’.
Ti’al u páajtal u meyaj Detector, je’el bix ts’a’abik u k’aaba’ nu’ukbesaje’, k’a’abéet u éekanearta’al jump’éel koodigóo QR. Beyxan k’a’abéet u ts’íibtik u k’aaba’ máak yéetel u yáantajil u nuumeroil u séelular yéetel u jach ila’al patal u k’aaba’ yéetel u núumeroil máak yanik, beey úuchik u ts’a’abal k’ajóoltbil ti’ u kúuchil k’a’aytajil péektsilo’ob Xinhua.
Ken ts’o’oko’ok u éeskanearta’al QRe’ yéetel u k’aaba’ máake’, nu’ukbesaje’ ku ye’esik wa máax táan u k’a’abéetkunsike’ yanchaj ti’ kúuchilo’ob tu’ux yanchaj uláak’ máako’ob tsaayal ti’ob le k’oja’ano’. Wa nu’ukbesaje’ ku yilik máan tak tu’ux yaan u sajbe’entsil u pa’ak’al k’oja’ane’, u jala’achilo’ob u lu’umil Chinae’ ku k’áatiko’ob ti’ máak ka p’áatako’ob tu yotocho’ob yéetel ka t’aanako’ob ti’ u mola’ayil toj óolal u noj kaajalo’ob.
Nu’ukbesaj beeta’abe’ meyajta’ab tumen u jala’achil u noj lu’umil China ti’al u ts’aatáanta’al u k’oja’anil coronavirus. Múul meyajta’ab ichil Oficina General del Consejo de Estado, Comisión Nacional de Salud yéetel u mola’ayilo’ob Grupo de Tecnología Electrónica ti’ u lu’umil China ti’al u ts’a’abal u páajtalil ti’ kajnáalo’ob u séeb péeko’ob ti’ le k’oja’ano’ ti’al ma’ tsa’ayal ti’ob.
