Néstor Jiménez y Alonso Urrutia
Oochelo'ob Notimex
K'iintsil
Tu súutukil u beetik u ka’ajytajil tsikbal u jala’achil u noj lu’umil México, Andrés Manuel López Obrador, chan je’el ti’al u tsikbaltik yaanal ba’al ti’ le tuláakal ba’al suuk u ya’alik tu kúuchil Palacio Nacional, ti’al beyo’ u t’anik tu tséel táankelem oaxaqueñoilo’ob ti’al u k’ubik paaxo’ob ti’ob; “tajan ma’alo’ob ka ma’achak paax tumen paalal, tu jeel ts’oon”, tu ya’alaj tu kúuchil Salón Tesorería.
Jala’ache’ tu jo’olbesaj u k’u’ubul u paaxo’ob ti’ táankelem paalal taalo’ob ti’ u lu’umil Oaxaca, tu súutukil táan u beetik u ka’aytajil tsikbal, le beetike’ paaxnaj Banda del Centro de Capacitación Musical y Desarrollo de la Cultura Mixe (CECAM) te’elo’.
Máax beetik u séekretariail kúultura, Alejandra Frausto, tu ya’alaj taak’in ti’al u ma’anal paaxo’ob k’ube’ ti’ jóok’ ti’ le koonol beetchaj Los Pinos, tu’ux béeychaj u mu’uch’ul 6.2 millonesil pesos, le beetik béeychaj u ma’anal mil u p’éel paaxo’ob káaj u k’u’ubul te’e lunes máanika’ yéetel yaan u ch’éenel u ts’a’abal tak ichil óoxp’éel winalo’ob.
Paaxo’obe’ yaan u ts’a’abal ti’ u múuch’ilo’ob paax yaan ichil le waxakp’éel jaatsilo’ob jóok’sa’ab ti’ le k’áata’an yáax beetchaj ti’ le mola’ayo’obo’, yéetel xan ti’ múuch’o’ob ma’ táaka’ano’ob ti’ mixjump’éel nu’ukbesaj miatsil.
“Táan k k’ubik k óol ti’ kuxtal yéetel paax… miatsile’ jach táaj yaan u muuk’ ti’al ka yanak jets’ óolal”, beey tu ya’alaj u x meyajil mola’ay.
“Paaxe’ u yóol, u piixan k kaajo’ob, beey úuchik u t’aan Adelfo Regino, máax jo’olebsik Instituto Nacional de los Pueblos Indígenas, máax xan tu ya’alaj jala’ache’ tu beetaj jump’éel mokt’aan tu’ux ku je’ets’ele’ yaan u chíimpolta’al CECAM tu táan a’almaj t’aan, le beetike’ yaan u yila’al ma’ u xu’ulul áantaj ti’al u páajtal u meyaj tu beel.
Ka’aj ts’o’ok yáax paaxe’, u jala’achil u noj lu’umil Méxicoe’ káaj u k’ubik paaxo’ob ti’ le múuch’ila’, beyxan jts’a’ab ti’ Escuela de Iniciación Musical Santa Cecilia Zaachila, Bachillerato Musical Zoogocho yéetel ti’ Banda Comunitaria de San Agustín Tlacotepec.
