de

del

Agencias
Oochel Reuters
K'iintsil

Lunes 27 ti' enero, 2020.
Calabasas, Estados Unidos

Ma’ táan u páajtal u éejenta’al mix tumen NBA mix tumen máaxo’ob beetik deportee’: Kobe Bryant, juntúul ti’ u asab k’a’ananil j báaxal báaloncesto yéetel juntúul ti’ máax ts’íibt u k’ajla’ayil u múuch’ báaxalil Lakers yaan tu noj kaajil Los Ángelese’, sa’at u kuxtal jo’oljeak domingo ti’ jump’éel áaxideente úuch ti’ éelikoptero tu’ux táan u bin ka’achij, beey úuchik u je’ets’el tumen u jo’olpóopilo’ob le kaajo’.

Bryant, jo’otéen loots’naj ti’ NBA yéetel u múuch’il Lakers, sa’at u kuxtal tu ja’atskabil domingo, naats’ ti’ u wiitsilo’ob Calabasas, tu noojolil California. 41 u ja’abil ka’achil, kantúul u paalal yanchaji. Te’e súut ka’aj úuch loobilaje’, láak’inta’an tumen uláak’ kantúul máako’ob, ichil le je’elo’obo’ ti’ yaan juntúul u paalil, Gianna Bryant, ba’ale’ chéen ka’aj lúub éelikopteroe’ ts’o’okole’ jóop k’áak’ ti’. Mix máak kuxlajij, yéetel ma’ ojéela’an xan ba’axten úcuhij.

Beey túuno’, a’alab xan u paalil Kobee’, Gianna Maria Onore, máax k’ajóolta’an ka’ach beey GiGie’, láayli’ ti’ yaan ka’ach ichil le éelikopteroo’ yéetel sa’at u kuxtal xan te’e súutuko’. 13 u ja’abil ka’achij.

U jala’achil u noj lu’umil Estados Unidose’, Donald Trump, tu ts’íibtaj ti’ Twittere’, u kíimil Brayante’ “¡U jeta’an k’aasil ba’al”.

Ma’ sáam ki’imak óoltak u asab k’a’anan aj báaxal, LeBron James, ti’ u múuch’ báaxalil Lakers tumen Bryante’ ka’aj úuch loobilaj. “Ma’ táan u xu’ulul k xíimbal te’e báaxalo’ @KingJames", tu ts’íibtaj. “In chíipolal ti’ in suku’un #33644", leti’e’ ts’ook ts’íib tu beetaj ti’ reedes sosiales.

U aj meyajilo’ob u jala’achil Los Ángelese’ tu ya’alajo’ob mix máak kuxlaj úuchik u lúubul péepen k’áak’ tu ja’atskabil domingo, tu wiitsilo’ob Calabasas, tu chik’inil Los Ángeles.

Sikorsky S-76 u jejeláasil éelikoptero tu’ux táan u bino’ob ka’achij, beey úuchik u ya’alal tumen u j k’a’aytajil Administración Federal de Aviación, Allen Kenitzer.

[b]Yaj óolta’ab tumen yóok’ol kaab [/b]

Kobe Bean Bryant síij tu k’iinil 23 ti’ agosto ti’ u ja’abil 1978 tu kaajil Filadelfia (Pensilvania), u jt’uupil ti’ óoxtul paalal -ts’o’okole’ chéen leti’ u xiibil- yanchaj ichil Joe Bryant yéetel Pamela Cox.

Bryante’ káaj u báaxal tu ja’abil 1996, junk’aal ja’abo’ob xáaanchaj tu báaxal tak ka’aj tu jets’aj yaan u luk’ul tu ja’abil 2016.

Beyxan ka’atéen yanchaj u medayail ti’ u keetil olimpiadas, úuchik u yáantik Dream Team ti’ u lu’umil Estados Unidos, ti’al u náajaltik u keetil Pekín-2008 yéetel Londres-2012.

Beyxan a’alabe’ u yatan Bryant, Vanessae’ ma’ tu yiknal yaan ka’aj úuch loobilaj.