AFp
Oochel Ap
K'iintsil
Irán.
Miércoles 8 ti' enero, 2020
Walkila’ ts’o’ok u yantal 56 u túul máak kimen yéetel uláak’ kex 200 ucha’an loob ti’ob úuchik u wo’oltikubáaj ya’abach máak jo’oljeak martes, ka’alikil táan ka’ach u mu’ukul géeneral iraníil Qasem Soleimani, tu noj kaajil Kerman, ti’ p’aatal tu nojollak’in Irán, kaaj tu’ux síij le máak kíinsa’ab tumen estadonidenseilo’ob úuchik u túuxta’al wak’bil ba’al tu lu’umil Irak.
"Doscientas trece u túul máak ucha’an loobilaj ti’, yéetel uláak’ 40 ts’o’ok u kíimilo’ob úuchik u seen cho’btal le muknáalo’”, beey tu tsikbaltaj máax jo’olbesik servicios de urgencias iraníes, Pirhossein Koolivand, ti’ máaben cha’an.
Beey túuno’ máaxo’ob ts’íibtik péektislo’obe’ páatchaj u jach iliko’ob bix cho’cho’bkil u bejilo’ob le kaajo’, úuchik u táakpajal ya’abach máako’ob chíimpoltik u j jo’olbesajil Fuerza Quds, kúuchil tu’ux ku tukulta’al tuláakal ba’ax ku beeta’al tumen Guardianes de la Revolución (u aj k’atunilo’ob Irán), máax kíinsa’ab le viernes máaniko’ yéetel u yáantajil drones, naats’ ti’ u aeropuertoil Bagdad.
“¡Ma’ táan k cha’ak u máan, yaan k sutik u jeel!”, beey u yawta’al tumen kaaj ka’alikil táan kaxtikubáaj u mach u kaajail tu’ux ku biinsa’al u wíinkilal Soleimani.
U k’íiwikil u kaajal aj k’atune’ buulul yéetel wíinik, óoli’ je’el bix úuchik tu k’iinil domingo yéetel lunes tu kaajil Teherán yéetel uláak’ kaajo’ob tu’ux máansa’ab u wíinkilal le aanimaso’ yéetel uláak’ u yéet meyajo’ob kíimo’ob xan le k’iin je’elo’.
Ts’o’ok u káajal meyajilo’ob ti’al “u jóok’sa’al Estados Unidos ti’ k lu’umil”, beey tsikbalta’ab ti’ u kaajil Kermán tumen Hosein Salami, j k’atun táan u jo’olbesik Guardianes de la Revolución.
“Yaan k sutik u jeel (...). Wa ku (loobiltiko’on tuka’atéene’) yaan k jopik k’áak’ ti’ ba’ax u yaabiltmajo’ob”, tu ya’alaj. “Leti’obe’ (Estados Unidose’) u yojelo’ob ba’ax yóok’lal kin t’aan”.
