Ka’aj ts’o’ok u beeta’al jump’éel takpool tumen plaza Forum, yanchaj uláak’ u jejeláasil takpoolo’ob beeta’ab tumen kaaj, ikil táan u “xche’ ch’a’abal” u k’áaxil nojlu’um naats’ yanik ti’ ja’ tumen máaxo’ob ts’a’aban u páajtalil u k’a’abéetkunsiko’ob u jáal ja’il Gaviota Azule’, u ajmeyajilo’ob Fiscalía General del Estado, Secretaría de Seguridad Pública, Marina yéetel Guardia Nacionale’ tu beetajo’ob múul meyaj ti’al láaj luk’sa’al ba’al te’elo’.
U nu’ukulil u chital máak, u ba’alil u chital máak jáal ja’, mooto ku bin ich ja’, kisib che’ob, mayak che’ob, ichil uláak’ ba’alo’obe’, ch’a’ab yéetel luk’sa’ab te’e jáaliko’ ti’al u béeytal u jo’op’ol u máan máak tu’uka’atéen te’elo’; yanchaj u k’a’abéetkunsa’al bolkeeteob yéetel nu’ukulo’ob líik’sik aal ba’alo’ob ti’al u páajtal u lúubsa’al jump’éel chan najil xa’an beeta’an tumen club Cielo Beach, jach ti’ yaan ka’ach paach ti’ plaza Fórum.
También te puede interesar: Frenan abusos de concesionarios en playa Gaviota Azul
Tu tséel túun Mandala Beache’ chéen luk’sa’ab u xóoxot’ che’ob ts’a’aban ka’ach ti’al u ye’esa’al u xuulil yaan yéetel u k’áaxil nojlu’um; ba’ale’ tumen mina’an mix jump’éel nu’ukul te’elo’ ma’ yanchaj u tokolch’a’abal mixba’ali’.
Yóok’lal ba’ax úuche’, u jaatisl meyajil k’áak’náab ti’ u lu’umil Quintana Rooe’, Consejo Coordinador Empresarial del Caribe, México SOS yéetel Mesa Ciudadana de Seguridad y Justicia de Cancún beyxan Isla Mujerese’ tu ki’imak óoltajo’ob ba’ax beeta’ab utmen u jala’achil u lu’umil Quintana Roo yéetel tumen u jo’olpóopil nojlu’um, máaxo’ob tu ya’alo’obe’, chéen bin tu beetajo’ob ba’al je’el bix jets’a’an ti’ a’almajt’aan, tumen yanchaj takpool beeta’ab yéetel tumen kaaje’ tu líik’saj u t’aan ikil u ti’alinta’al u jáal ja’ilo’ob Cancún kex tumen ti’al kaaj.
Tu sáasilkunsajo’obe’, táan u kaxta’al ka jeel ts’a’abak ti’ kaaj ba’ax ts’o’ok u luk’sa’al ti’ ka’achij. Meyaje’ beeta’ab úuchik u je’ets’el tumen juntúul juees, máax tu jéets’t’antaj u ju’unil FGE/5298/2021, tumen u ch’a’ab ti’alintbil, kex ma’ cha’abane’, k’áax ti’al u nojlu’um, ba’ale’ a’alab xane’ yaan u xak’alta’al páajtalil ts’a’aban ti’ Mnadala Beach Club, tumen chéen sáasilkunsa’abe’ ma’ cha’aban ti’ob u ts’áako’ob mix ba’al ti’al u ye’esiko’ob tu’ux ku náakal u xuulul jáal ja’ u ti’alo’ob.
Xak'alutskíinsa'an tumen: Sasil Sánchez Chan
