Ko’olelo’ob chíibesk u jejeláasil koonol ku beeta’al tu méek’tankaajil Tulume’ tu tsikbaltajo’ob ba’ax talamil ku máansiko’ob ti’al u páajtal u beetik u meyajo’obi’, ts’o’okole’ u ya’abil ti’ leti’obe’ tu ya’alo’obe’ k’a’anan bin u tse’elel tuukul jeets’a’an yóok’lal ko’olel yaan ti’ mejen kaajo’ob, ti’al beyo’ u páajtal u yantal u muuk’il xan u náajalo’obi’.
Ichil ba’ax ku taal u beeta’al tumen Agenda Ciudadana para el Desarrollo Sustentable ti’ u kaajil Tulume’, jo’olbesa’ab jump’éel tsikbal tumen Morgan Levy, ikil u kaxta’al ka sáasilchajak ba’ax talamilo’ob yaan ti’al u káajal u yantal taak’in ti’ ko’olel.
También te puede interesar: Es necesario romper estereotipos: empresarias de Tulum
Ingrid Ávila, máax tu káajsak jump’éel chan mola’ay ti’ u ts’aak yéetel u bookil ba’al yéetel kosmetiko’obe’, tu ya’alaje’ u talamil u yúuchul meyaje’ leti’e ba’alob ku k’áata’al ti’al u páajtal u je’ebel mola’ay, le beetike’ yaane’ ku xun p’atta’al le meyajo’; k’a’anan ma’ u talamkúunsa’al le beyka’aj ba’ax ku k’áata’ali’, ts’o’okole’ unaj xan u kaambal meyajnáalo’ob yaan te’e kúuchilo’obo’ ti’al u yáantik máax k’a’abéet ti’ob.
Lidia Ávila, suuk u beetik ba’al ti’al jaantbil; tu ya’alaj xane’ táan u binetik kaambal yéetel ka péeknak u yóol meyajnáalo’ob yaan, ts’o’okole’ tu páayt’antaj uláak’ ko’olel u káajsmaj u mola’ayil koonole’ ti’al ma’ u chi’ichnaktalo’ob kéen u yilo’ob beyka’aj ba’al ku yantal u beeta’al. Karla Acevedo tu ya’alaje’ “juntúul ko’olel chi’ichnak ti’al u tséentikubáaj wa ti’al u tséentik u paalale’ jach ma’ tu yantal u súutukil u ma’alobkúunsik ba’ax u yojel u beetej”.
U yuumil jump’éel mola’ay ti’al janale’, Patricia Alamillae’, tu k’a’ajsaje’ ti’ leti’e ya’abach talamilo’ob yanchaj ti’al u káajsik kúuchil yaan ti’, ba’ale’ ku tukultike’ k’a’anan u táakmuk’ta’al ko’olel ti’al u kaambal yéetel ti’al u káajsik u meyajtik ba’ax u yojel tu juunal. Fany Canché, juntúul u yuumil mola’ay yaan tu kaajil San Silverio, tu baantail Tulum, ku táakmuk’tik u xíimbalta’al kaajo’ob. Leti’e tu ya’alaje’, te’e mejen kaajo’obo’ táan u binetik kaambal.
Tsikbalo’obe’ yaan u beeta’al tak tu k’iinil 10 ti’ abril yéetel u tse’ekil “Para las niñas y los niños: mamás, papás y educadores” yéetel lunes 12 ti’ abrile’ yaan u beeta’al le k’aaba’ta’an beey “Administradoras de recursos públicos”.
Xak'alutskíinsa'an tumen: Sasil Sánchez Chan
