de

del

Máax beetik u súubdirektooril Organización Panamericana de la Salud (OPS), Jarbas Barbosa, tu tsikbaltaj le miércoles máanika’, ku yantal máax konik u báakunail Covid-19 kex ma’ jaajtaki’. Le je’ela’ ku yúuchul tu lu’umil Argentina, Brasil yéetel México, lela’ jump’éel “talamil” ku yantal ti’ u jo’olpóopilo’ob toj óolal yéetel máaxo’ob kanantik kaaj.

Ka’aj k’áatchibta’ab yóok’lal u tsoolts’íibil jóok’sa’ab tumen u pik’ilju’unil The Wall Street Journal tu’ux ku xo’okol jejeláas ba’alo’ob ti’ u ko’onol tuusil báakunao’ob ku ya’alal beeta’an tu kúuchil xaak’al Pfizer, tu lu’umil México, le beetik Barbosae’ tu ya’alaj: “Jaaj, ts’o’ok k-ojéeltike’ yaan u kaajilo’ob México, Argentina yéetel Brasil tu’ux ku ya’alal yaan báakuna ku ko’onol ti’ reedes sosiiales”.

 

También te puede interesar: Vacunas ''falsas o robadas'' en México, Argentina y Brasil: OPS

 

“Koonol ku beeta’al chéen tu yáamil bo’oye’, ku k’a’aytik báakuna chéen xmáaman beeta’an, ma’ leti’e jach jaajo’. U jeel ba’ax ma’ xaan wa táan u yúuchule’, táan u yokolta’alob ti’ u kúuchil toj óolal, ba’ale’ mix máak ku páajtal u jets’ik wa tu beel líik’sa’ano’obi’”, beey úuchik u ya’alik Barbosa, ti’ k’a’aytajil tsikbal tu beetaj.  

“Beey túuno’, sáasil yanik le je’ela’ jump’éel talamil táan u yantal, ma’ chéen ti’al u jo’olpóopilo’ob toj óola, beyxan ti’al ajkanan kaajo’ob, tumen k’a’abéet u yilko’ob tu’ux u taal le ba’ax táan u yúuchula’”, tu ya’alaj.  

Barbosae’ tu k’áatóoltaj ka chíimpolta’ak báakuna ku ts’a’abal tumen u jo’olpóopilo’ob toj óolal, tumen chen leti’e’ je’elo’obo’ “mina’an sajbe’entsili’ yéetel ma’alob u meyajo’obi’”, ts’o’okole’ tu beel xan líik’sa’an ti’al u páajtal u yutisl k’a’abéetkunsa’al.

“Le beetike’, jach táaj k’a’anan ma’ u ma’anal mix jump’éel báakuna ka k’a’aytak ti’ reedes sosiiales wa ti’ Internet”, tu ya’alaj. “Sajbe’entsil ti’al u toj óolal máak”, tu ts’ook a’alaj.  

The Wall Street Journal tu ts’áaj k’ajóoltbil le miércoles máanika’, u mola’ayil Pfizere’ táan u múul meyaj yéetel u jo’olpóopilo’ob México ti’al u yila’al ba’ax táan u yúuchul yéetel le tuusil báakunao’oba’.  

Pik’il ju’une’ tu ya’alaje’, tu lu’umil Estados Unidos, México yéetel uláak’o’obe’ ts’o’ok u yila’ale’ “u tajan ya’abil web kúuchilo’obe’” tu’ux ku jach tuusil a’alal yaan u báakunail Pfizer ti’ob ti’al konbil, beyxan le beeta’an tumen estadunideseil kúuchil xaak’al Moderna.

Xak'alutskíinsa'an tumen: Sasil Sánchez Chan