Consejería Jurídica ti’ u jala’achil u lu’umil Q. Roo ma’ tu ts’aatáantaj talaml yaan ti’al u je’ets’el u xuul u lu’umil, beey úuchik u ya’alik abogado Andrés Blanco Cruz, máax tu ya’alaje’ le máax kéen u chíikbes nojlu’ume’ ma’ séeb k’uch te’e múuch’kab p’is óolal beeta’ab tumen Suprema Corte de Justicia de la Nación (SCJN) ti’al u ye’esa’al jaajkúunaj chíikul yéetel ba’atelt’aan yaan ka’ach tu k’iinil 13 ti’ abril. “Ts’o’okili’ u máan u súutukil ka’aj ts’a’ab k’ajóoltbili’”, tu ya’alaj.
Abogadoe’, leti’e’ máax chíikbesik ba’al taak’al ti’ a’almajt’aan ti’ u jejeláas kaajo’ob yaan tu xuul k’áaxil taak’al Kaanpech, tu ya’alaje’, máaxo’ob ku yutsil t’aano’ob yóok’lal u xuul k’áaxil nojlu’ume’ ti’ jóok’ ti’ xwo’okinil yáax yanchaj yóok’lal ba’ax a’alab timen Yucatán ti’al u taal u ts’o’okbal u ja’abil 2019, ts’o’okole’ le je’elo’ chéen beey báaxal t’aan ku beetik Consejería Jurídica ti’ le nojlu’umo’.
También te puede interesar: Desatiende QRoo conflicto limítrofe; no llega a audiencia en la SCJN
“Kex ma’ patal yéetel kex mina’an u jaajil t’aane’ ma’ táan u ts’aatáantiko’ob p’is óolal jets’a’an unaj u beeta’al tumen SCJN ti’al u ts’a’abal k’ajóoltbil jaajkúunaj chíikul yéetel ba’atelt’aan ichil u takpoolil 1/2021-CC, jóok’ ti’ xwo’okin almejenil a’almajt’aan jets’a’ab ti’ 226/2019”, tu ya’alaj Blanco Cruz.
Abogadoe’ tu ya’alaje’ ichil ba’ax ku takpolta’ale’, ti’ yaan u páajtalil kaajo’ob yaan te’e xuul k’áaxilo’ ti’al u yantal ja’ ti’ob, le beetik beeta’ab takpool tu táan SCJN ti’al u beeta’al u k’ujsa’alja’ ti’ u kaajil Guillermo Prieto, Felipe Ángeles yéetel Caña Brava, tumen ku ya’aliko’obe’ táan u péech’óolta’al jáalk’ab kuxtal, le beetike’ k’ujsa’ab t’aan tak Consejería Jurídica, Comisión de Agua Potable y Alcantarillado, je’el bix xan tu Ayuntamientoil Othón P. Blanco ti’al u kaláanta’al k’áax, tumen ma’ ts’aatáanta’ak le talamila’, tumen u jurídicoil mola’ay le lu’uma’.
Ts’o’okole’ ikil túun u ts’aatáanta’al takpool beeta’ab tumen Kaanpeche’, abogadoe’ béeychaj u yilike’, u Consejería Jurídica ti’ u jala’achil u lu’umil Quintana Roo ma’ k’uch te’e múuch’kab p’is óol jets’a’ab unaj u yantal tumen Cortee’ le 13 ti’ abril máaniko’.
“Ka’aj ts’a’ab k’ajóoltbile’ ts’o’okili’ u máan u súutukil (...) chéen t’aano’ob le tu’ux ku ya’alike’ ma’ táan u ts’a’abal mix junchan xéet’ u lu’umil Quintana Roo, tumen tu jach jaajil ba’al ku yúuchule’, óoli’ beey chéen báaxale’, ma’ táan u ts’aatáanta’al tumen Consejería Jurídica le ba’ax ku yúuchula’”, tu ya’alaj.
Tu ya’alaje’, Consejería Jurídicae’ táan u kaxtik ka sa’atak takpool beeta’an tu táan SCJN, ti’al beyo’ ma’ u yantal u bo’ota’al 100 miyoonesil pesos jatsa’an ti’al u páajtal u k’a’abéetkunsa’al ti’ u ja’abil meyaj tumen Congreso de Quintana Roo, ts’o’okole’ u k’áat xan u je’els meyaj unaj u yantal ti’al u k’ujsa’al ja’ te’e kaajo’ob ts’o’ok u ya’alalo’.
19 ti’ enero máaniko’, máax beetik u jno’oj k’abil u ja’alachil Quintana Roo, Arturo Contreras Castillo tu sáasilkunsaj ti’ reedes sosiialese’, láayli’ táan u ba’ateta’al u kaláanta’al u k’áaxil le lu’umo’, mina’an u p’iisil u beeta’al.
Xak'alutskíinsa'an tumen: Sasil Sánchez Chan
