Le miércoles máanika’, káaj uláak’ u jaats meyajil ti’al u ts’a’abal u báakunail Covid-19 ti’al máax yaan u ja’abil ichil 50 tak 59 ja’abo’ob, ba’ale’ úuchik u káajale’, ma’ ya’ab máak táakpaji’; ma’ ya’ab máax k’uch tu kúuchil Décimo Batallón de Infantería yéetel u ju’unil ti’al u páajtal u ts’a’abal u yáax jaatsil ts’aak.
Te’e ja’atskab k’iino’, ka’alikil láaj xa’ak’paja’an ba’al, je’el bix úuchik u ya’alal tumen máaxo’ob bino’ob Región Militar de Campeche, káaj u ts’a’abal báakunáa ti’ máax yaan u ja’abil ichil 50 ja’abo’ob tak 59, tu noj kaajil Kaanpech yéetel Champotón.
También te puede interesar: Sin fecha para iniciar vacunación a mayores de 50 años en Carmen
Ya’ab ti’ máaxo’ob bine’, tu ya’alajo’ob ma’ séeb a’ala’ab ti’ob ba’ax k’iin kéen káajak u ts’a’abali’, ts’o’okole’ óoli’ yanchaj u chuchuk na’atiko’ob tu’ux te’e kun ts’a’abil ti’obi’; ka’aj k’ucho’ob Décimo Batallón de Infantería a’ala’ab ti’obe’ chéen bin máaxo’ob siijilo’ob enero yaan u ts’a’abal, ts’o’okole’ jcha’ab u máan tuláakal máaxo’ob k’uch te’elo’, tumen ti’ mix máak yaan u ju’unil ti’ ba’ax k’iin yéetel ba’ax súutukil unaj u ts’a’abali’.
Ka’aj túun béeychaj u yokol máake’, ila’ab yaan máax uts u k’a’amal tumen yaan u k’ajóolalo’obi’, ts’o’okole’ mix táan u páa’tiko’ob mix ba’al, junpuul u máansa’alo’obi’, je’el bix úuchik yéetel u no’oj k’abil Protección Civil del Estado, Edgar Hernández Hernández, máax k’uch ts’o’okili’ u máan láas 10, ba’ale’ táanil úuchik u máan ti’ máaxo’ob k’ucho’ob láas 6 ja’atskab k’iin.
Óoli’ te’e súutuko’, jts’a’ab k’ajóoltbile’ ma’ bin táan u chúukpajal báakunáa ti’al máax yaano’ob te’elo’, le beetike’ yanchaj u bin ch’a’abil uláak’; oora yéetel uláak’ táanchúumuk xáanchajo’ob, ts’o’okole’ yanchaj u páa’ta’al uláak’ táanchúumuk oora ti’al u yíibil u batil le táant u taasalo’obo’.
Ka’alikile’, tu yóox nabal jaatsil Lermae’, láayli’ xan beey úuchiko’, tumen máaxo’ob bino’obe’ mina’an mix u siitao’, ts’o’okole’ kex beyo’ jts’a’ab ti’obi’; kúulpchile’ yanchaj uláak’o’obe’ ma’ jts’a’ab ti’obi’ tumen ma’ enero bin úuchik u síijilo’obi’, ba’ale’ te’elo’ tak máax ku bin tu kiis buuts’ilo’obe’ jts’a’ab ti’ob yéetel tak ti’ u láak’inajo’ob ts’a’abij.
Ichil ba’ax a’alab tumen ajmeyajil u nu’ukbesajilo’ob nojlu’ume’, Katya Meave Ferniza, káaj u ts’a’abal báakuna te’e k’iina’ yéetel yaan u ts’o’okol tak tu k’iinil 9; yaan u ts’a’abal ti’ máax yaan u siitáa yéetel yaan u káajal láas 10, ts’o’okole’ wa tumen chukpaj u báakunaile’ yaan u ts’a’abal ti’ máax mina’an u k’aaba’ te’e tsoolilo’, tumen ichil ba’ax ojéela’an tumen Secretaría de Bienestar, yaan kex 15 mil nojoch máak yaan u ja’abil ichil 50 tak 59 ja’abo’ob.
Xak'alutskíinsa'an tumen: Sasil Sánchez Chan
