de

del

Seduce’ ku xot’ik nu’ukbesaj jets’a’an ti’al u káajal u suut máak ti’ najilo’ob xook

Seduc suspende protocolo de regreso a clases presenciales en Campeche
Foto: Fernando Eloy

Te’e k’iino’oba’, k’a’ayta’ab u suta’al k’aank’anil u boonil Semáforo Epidemiológico Nacional ti’ u lu’umil Kaanpech. Secretaría de Educación (Seduc) tu k’i’itbesaj jump’éel k’uben t’aan beeta’ab tumen máax jo’olbesik le mola’ayo’, Ricardo Koh Cambranis, tu’ux ku ya’alike’, u bin máak ch’a’a xook te’e najilo’ob xooko’ yaan u ka’a xóot’ol tak kéen a’alak je’el u béeytal u ka’a bin máake’. Le je’ela’ beey a’alabik kun úuchul wa tumen ku yantal u ch’éenel u bin máak tuka’atéen.  

Koh Cambranis tu ya’alaje’, yaan 135 u p’éel najilo’ob xook táan ka’ach u k’amiko’ob xoknáalo’ob yéetel ajkansajo’ob tak le viernes máanik ti’ le kúuchilo’obo’, ba’ale’ ts’o’ok u xot’ik u meyaj ka’ap’éel ti’ le je’elo’obo’. Jump’éele’ tumen yaan u sajbe’entsil yaan máax ti’ tsaayal Covid-19i’ yéetel uláak’ jump’éele’ tumen yaan máax ichil le ajka’ansajo’obo’ yaan ti’. Ka’aj káaj u suut máak te’e najilo’ob xooko’ yaan ka’ach 137 u p’éelal.  

 

También te puede interesar: Seduc suspende protocolo de regreso a clases presenciales en Campeche

 

Le ba’ax táan u yúuchula’ yaan xan u xaankúunsik u beeta’al Consejos Técnicos Educativos (CTE), tumen táan ka’ach u láaj líik’sa’al ba’al ti’al u ssut tuláakal máak te’e najilo’ob xooko’, tumen ts’o’ok maanal jump’éel ja’ab káajak u beeta’al u múuch’tambalilo’ob  CTE ti’ Internet, ti’al beyo’ ma’ u yantal u múuch’ul máak. 

Koh Cambranis tu tsikbaltaje’, yaan u múul meyaj yéetel Secretaría de Salud ti’al u yilko’ob bix u bin ba’al yéetel pak’be’en k’oja’an te’e péetlu’umilo’, beyxan bix u bin u ts’a’abal báakuna ti’ kaaj, tumen walkila’ táan u ts’a’abal ti’ máax yaan u ja’abil ichil 50 tak 59, je’el bix xan ti’ ko’olel yo’omchaja’an ts’o’ok 18 u ja’abil yéetel maanal ti’ bolonp’éel p’isk’iinil k’oja’anchajako’ob.  

Ma’ jets’a’ak wa yaan u táaj xo’o’ot’ol xook wa tumen ka káajak u ka’a piimtal Covid-19i’, te’e k’uben t’aano’ chéen ku je’ets’el ba’ax kun beetbil tak walkila’, ba’ale’  Koh Cambranise’ tu ya’alaje’ táan u páa’tiko’ob ka béeyak u kaláanta’al kaaj yéetel u yila’al ma’ u ka’a ya’abtal k’oja’an.  

Xak'alutskíinsa'an tumen: Sasil Sánchez Chan