de

del

Xyoutuber Maire Winke’ tu ts’áaj k’ajóoltbil takpool tu ts’áaj yóok’ol Ricardo Ponce, juntúul máak ku sáasilkunsik u beel u yóol wíinik, máax beetik sexual loobilaj yóok’ol máaxo’ob ku táakpajal ti’ “jaatsk’iino’ob ti’al u meyajta’al u yóol wíinik”, tu kaajil Bacalar, Tulum yéetel Cancún. Cha’an tu’ux jts’a’ab k’ajóoltbil le je’ela’, tu ts’áaj u k’aba’taj beey “Caí en la secta sexual de Ricardo Ponce”, te’elo’ ku tsikbaltik ba’ax úuch le febrero máanika’, úuchik u táakpajal ti’ jump’éel meyaj tu beetaj le máako’. 

Féeminista múuch’kabilo’obe’ tu ya’alajo’obe’ jach táaj k’a’anan u chíikbesa’al ba’al beey ku yúuchulo’oba’, ti’al beyo’ u ts’a’abal u si’ipil máaxo’ob beetik. Ricardo Poncee’, tu ts’íibtaj ti’ reedes sosiialese’ yaan u tsikbaltik xan “u jaajil ba’al, ma’ chéen ba’alo’ob ma’ sáasil yaniko’obi’”.  

 

También te puede interesar: Denuncian a 'coach' emocional por abusos sexuales

 

“Tin wilaj yaan jela’antak ba’alo’ob te’e jatsk’iino’ob úuch meyaji’, ts’o’okole’ ma’ in k’áat ka yanak uláak’ máax máansik ba’al beya’, mix xan ka xi’ik wa máax tumen teen péektisltej (...) lúuben ti’ ba’ax kin na’atik beey culto sexual ba’ale’ ta’akan yéetel u k’aaba’ u beelkúunsa’al u yóol máak”, tu ya’alaj Maire Wink. 

Te’e cha’ano’, ku táakpajal xan uláak’ kantúul máak ku tsikbaltik xan u jejeláasil ba’al úuch ti’ob yéetel Ricardo Ponce, máax tu pataj u k’aaba’ beey “el creador de la auto sanación”. Maire Winke’ ki yilik beey juntúul máak “u jach kanmaj yéetel u na’atmaj bix yanik u yóol máak, kex óol talam yanik k’uuxil yéetel ok’om óol”.

Xyoutubere’ ku takik u pool Ricardo Poncee’ tumen ku ch’a’ak u báaxt u yóol máax ku táakpajal ti’ le meyaj ku beetiko’, ts’o’okole’ je’el tak u tojoltik ichil 55 mil tka 71 mil pesos.  

Ti’al u winalil febrero ti’ le ja’aba’, xyoutubere’ t’a’an tumen Ponce ti’al u yu’ubik u tse’ek kéen u beet Bacalar, le tsikbalo’ ku k’aaba’tik “El chakra del corazón”; ti’ tu k’ajóoltaj máaxo’ob ku meyaj yéetel le máako’, yéetel ku ya’alike’ “jach ki’ichpano’ob”.  

Ku tsikbaltike’, le yáax k’iino’, tsikbalta’ab bix u biinsikubáaj máak, ba’ale’ jach séeba’an “úuchik u súutul beey sexual ba’al”, tak ka’aj p’áat beey jump’éel secta sexual, tu’ux mu’uch’ul ko’olelo’ob ku t’a’anal ti’al táakopajali’, ikil u táabsiko’ob kex ma’ u yojelo’obi’.  

Ti’ reedese’ Maire Winke’ tu káajsaj u ts’íibt u hashtagil #MeTooRicardoPonce, ti’al u yáantik uláak’ ko’olelo’ob.  

Tania Ramíreze’, máax táakpaja’an ti’ u múuch’kabil Siempre Unidas, ku ya’alik jach táaj k’a’anan u chíikbesa’al le ba’alo’oba’, tumen ku ye’esa’al loobilaj ku yantal ti’ meyajo’ob je’el bix le je’ela’: “ku loobiltik ko’olelo’ob ma’ mu’uk’a’antak u yóolo’obi’, ts’o’okole’ ku ya’alik ti’obe’ ka u cha’a ka yaabilta’ako’ob, ku t’aan tu k’aaba’ le yaabilajo’ chéne ti’al u ts’áak u na’ato’obe’ wa ku yantal ba’al u yil yéetelo’obe’ yaan u yutstal u yóolo’ob”. 


Xak'alutskíinsa'an tumen: Sasil Sánchez Chan