Úuchik u ts’o’okol u laj xo’okol tu beel, tumen u mola’ayil Instituto Electoral y de Participación Ciudadana (Iepac), tuláakal u yéeyajo’ob yanchaje’, chíikpaj ti’ le 42 u p’éel áayuntamientoilo’ob yaan tu péetlu’umil Yucatáne’ j p’áat meyaj juntúul máax táaka’an Partido Acción Nacional (PAN), almejen múuch’kabil tu’ux táaka’an xan u jala’achil le péetlu’uma’, Mauricio Vila Dosal, máax yaan tu jach ka’analil p’iisil beeta’ab ti’al u yojéelta’al utsil éejenta’an meyaj ku beetik, ichil u jeelo’ob yaan ti’ u lu’umil México.
También te puede interesar: 42 ayuntamientos de Yucatán serán dirigidos por el PAN: Iepac
Ichil u ts’ook k’áatchi’xaak’al beeta'ab, Ranking Mitofsky Capítulo: Gobernadores y Gobernadoras de México ti’al u yojéelta’al bix u yilik kaaj u meyaj jala’ache’, chíikpaj u jala’achil Yucatáne’ jach k’a’anal yaan tumen p’isa’an yéetel 71.5%, jump’éel winal ma’ili’ beeta’ak yéeytambal.
Ichil túun le 42 u p’éel méek’tankaajo’ob tu’ux yaan u yantal juntúul u jala’ach táaka’an ich PANe’, ti’ yaan u nojkaajil Jo’, tumen Renán Barrera Concha ka’a yéeya’ab beey jo’olpóop, ts’o’oole’ leti’e’ yáax máak kéen u beet óoxpuul u jala’achil.
Ichil ba’ax a’ala’ab tumen Instituto Nacional Electoral (INE) maanal jump’éel miyoon 59 mil 480 u túul máak táakpaj te’e yéeytambal yanchaj le domigno 6 ti’ junio máanika’. Beyxan, je’el bix úuchik u p’áatal ya’abach u máakil PAN ti’al u beetik u jo’olpóopile’, láayli’ xan beey úuchik u p’áatal meyaj u ya’abil ichl Congreso del Estado, tumen 14 u túulal ku yantali’.
Chéen ti’ jump’éel u kúuchil ma’ táan u jéets’el meyaj PANi’; yaan u táakpajal juntúul u máakil Movimiento Regeneración Nacional (Morena). Leti’e’ máax báaxalnaj Distrito VIII.
Uláak’ ba’al, yáax juntéen kéen meyajnak bolontúul ko’olel beey u ajpat a’almajt’aanil le péetlu’umila’, ts’o’okole’ waxaktúul ti’ leti’obe’ ti’ PAN jok’a’ano’obi’.
Xak'alutskíinsa'an tumen: Sasil Sánchez Chan
