Junmúuch’ táankelemo’ob síijo’ob tu lu’umil Yucatáne’, tu ts’áajo’ob k’ajóoltbil tu táan u yich yóok’ol kaabe’, u sientiifikóo xaak’al tu beetajo’ob ikil u kaxtiko’ob u péektsiltiko’ob u k’a’abéetkunsa’al u kuxtalil lu’um, ti’al beyo’ ma’ u seten kíinsa’al kuxtal ku yantal te’elo’, le beetike’, meyaj tu beetajo’obe’ chíimpolta’ab yéetel Mención honorífica ichil Olimpiada Internacional de Proyectos de Ciencia 2021 (International Science Project Olympiad- INSPO), beeta’ab tu lu’umil Turquía.
También te puede interesar: Jóvenes yucatecos destacan en Feria de Ciencia en Turquía
Luna Danae Euan Chab yéetel Farid Rodrigo Gómez Villegase’, chíikpajo’ob ichil le 21 u p’éel múuch’meyajo’ob táakpaj ti’ u jejelás lu’umilo’ob yóok’ol kaab, ichil u jaatsil Medioambiente ti’ INSPO 2021. Euan Chab yéetel Gómez VIllegase’ tu tsikbaltaj u meyajo’ob, tu táan juraadóo; leti’obe’ tu patjo’otajo’ob jump’éel túumben nu’ukbesaj ti’al u k’i’itbesa’al yéetel u kaláanta’al x ts’iipil (Beaucarnea pliabilis), junkúul xíiw suuk u yantal tu lu’umil Yucatán, ts’o’okole’ sajbe’entsil yanik tumen je’el u ch’éejele’, beey jets’a’an ichil NOM-059-SEMARNAT-2010, tumen te’e tu’ux ku yantal k’áax k’ajóolta’an beey baja caducifolia yéetel mediana subcaducifolia, ma’ ya’ab p’aatal ti’ le beyo’oba’.
K’a’anan u ya’alal le meyaj beeta’aba’, belbesa’ab tumen aj xak’al xooko’ob Miguel Ángel Herrera Alamillo, Leticia Peraza Echeverríay, Ileana Borges Argáez u teeknikoilo’ob xaak’al Unidad de Biotecnología ti’ Centro de Investigación Científica de Yucatán (CICY), ba’ale’ múuch’ile’ táakpaja’an ichil Talento CICY.
U múuch’il meyaj Luna yéetel Faride’, béeychaj u táakpajal ti’ le ketlama’, úuchik u yáax táakpajal ichil Expociencias Yucatán 2020 (tu’ux tu náajaltajo’ob u yáax kúuchil, ichil u jaatsil Pandilla científica juvenil), beyxan táakpajo’ob Expociencias Nacional 2021, beeta’ab tu péetlu’umil Sonora.
Xak'alutskíinsa'an tumen: Sasil Sánchez Chan
