U mola’ayil Fondo Nacional de Fomento al Turismo (Fonatur) yéetel Organización de las Naciones Unidas para la Educación, la Ciencia y la Cultura (UNESCO) tu múul betajo’ob ba’ax k’aaba’inta’ab beey Consejo Científico-Cultural, ikil táan ts’aatáanta’al u nu’ukbesajil láak’inaj meyaj, ti’al u yila’al ka utsil xíimbalnak u beel Tren Maya.
U tukulil Consejo Científico-Culturale’, leti’ ka béeyak u táakbesa’al máako’ob yéetel mola’ayo’ob k’a’anantak ti’ miatsil, xaak’al yéetel máaxo’ob u yojel u ch’a’anuk bix yanik yóok’ol kaab, ichil múuch’tsikbal yéetel xaak’al yaan u beeta’al tumen UNESCO, ti’al u páajtal u yutsil xíimbal meyaj táan u beeta’al.
U x meyajnáalil Cultura, Alejandra Fraustro Guerrero, tu ya’alaje’ “u táakpajal Secretaría de Cultura ichil u meyajil Tren Mayae’ jump’éel ba’al k’a’anan yéetel unaj mantats’. U beelal jump’éel nojoch meyaj táan u líik’sa’al je’el bix Tren Mayae’, leti’ u kaláantik miatsil ku núup’ul ichil le kaajo’ob tu’ux kun máano’, le beetike unaj u xak’alta’al yéetel u kaláanta’al ba’ax yaan walkila’, le beetik táan u yúuchul múul meyaj yéetel Fonatur”.
También te puede interesar: Fonatur y Unesco forman el Consejo Científico-Cultural para el Tren Maya
Beyxan, Rogelio Jiménez Ponse’ tu ya’alaj Consejoe’, jump’éel mola’ay nuup’ul meyaj yéetel Programa de Acompañamiento, táan u taal u beeta’al tumen UNESCO. Le múuch’meyaja’ ku kaxtik u ts’aatáantik meyaj unaj u beeta’al tumen u mola’ayilo’ob u lu’umil México, mola’ayo’ob ku beetiko’ob xaak’al yéetel kaaj, ti’al u yila’al bix beeta’anil meyaj ichil UNESCO yéetel FONATUR.
Ka’alikile’, Frédéric Vacheron, máax chíikbesik UNESCO tu lu’umil México, tu ya’alaj Consejoe’ k’a’anan nu’ukbesaj ti’al láak’inaj meyaj tumen ku nup’ik yéetel meyaj ku taal u beeta’al UNESCO ichil Tren Maya: u yantal u yutsil náajal tuláakal máax táaka’ani’, u kaláanta’al yóok’ol kaab, u yúuchul tsikbal yéetel mola’ayo’ob, yéetel u jets’a’al ba’al chéen wa beeta’an xaak’al k’a’abéet u ti’al.
Yéetel Consejoe’ yaan u ts’aatáana’al jejeláas meyajo’ob ku beeta’al ichil Proyecto de Acompañamiento para el Desarrollo Sostenible en la ruta del Tren Maya, je’el bix: u patjo’olta’al u nu’ukbesajil u k’ama’al aj xíinximbal máako’ob kéen jo’op’ok u máan Tren Maya, tu jo’oloj junk’aal ja’abo’ob, ti’al beyo’, u péektsilta’al u beeta’al nu’ukulo’ob yéetel meyajo’ob no’ojantak, tu’ux ka béeyak u na’atal, u cha’anta’al yéetel u yutsil chíikbesa’al miatsil yaan te’e lu’umo’obo’, ikil xan u ts’a’abal u páajtalil ti’ kaaj yéetel múuch’o’ob ti’a u jets’iko’ob bix kéen u beeto’ob ba’ax ku tukulitko’ob.
Tukulta’an u múul meyajta’al ichil kaajo’ob yéetel u múuch’ilo’ob le lu’umo’obo’, ba’ax u ba’alumbáajo’ob ti’al u beeta’al u tsoolts’íibil, beyxan ti’al u patjo’olta’al u nu’ukbesajil u kaláanta’al, ti’al beyo’ u yutsil k’a’abéetkunsa’al ba’al, ichil uláak’ ba’alo’ob.
Ichil múuch’kabile’ táaka’an 16 u túul máako’ob jeets’el ti’ yano’obi’, tu’ux páayt’aanaj UNESCO yéetel Fonatur ti’al u yantal uláak’ mola’ayo’ob meyaji’, je’el bix: Secretaría de Cultura; Secretaría de Turismo; Secretaría de Medio Ambientes y Recursos Naturales; Secretaría de Relaciones Exteriores; Instituto Nacional de los Pueblos Indígenas (INPI); INAH; Instituto Nacional de la Economía Social (INAES); Comisión Nacional de Áreas Naturales Protegidas (Conanp), beyxan kajnáalo’ob yéetel u jaats xaak’al máako’ob ti’ u nojol-lak’inil México.
Xak'alutskíinsa'an tumen: Sasil Sánchez Chan
